საქართველოს ოკუპირებული ტერიტორიებიდან დევნილთა შრომის, ჯანმრთელობისა და სოციალური დაცვის სამინისტრო, კორონავირუსის პრევენციის მიზნით, იყენებს ინოვაციურ შესაძლებლობებს ინფექციის გავრცელების ადრეულ სტადიაზე, აპლიკაციის მიზანს წარმოადგენს სანდო ინფორმაციის უზრუნველყოფა და დაავადების უკონტროლოდ გავრცელების თავიდან აცილება, – ამის შესახებ ჯანდაცვის სამინისტროს მიერ გავრცელებულ ინფორმაციაშია აღნიშნული, სადაც საუბარია ახალ აპლიკაციასთან დაკავშირებით საერთაშორისო მედიის გამოხმაურებაზე.
ჯანდაცვის მინისტრი ეკატერინე ტიკარაძე საერთაშორისო გამოცემასთან საუბრისას განმარტავს, რომ აპლიკაციის გამოყენებით, კორონავირუსის დაფიქსირების შემთხვევაში, გაცილებით უფრო სწრაფი რეაგირება მოხდება. „ჩვენ გვსურს პაციენტების არსებული საუკეთესო სამედიცინო პრაქტიკით უზრუნველყოფა და მოსახლეობის დაცვის მიზნით, დაავადებასთან ყველა არსებული შესაძლებლობით, მაქსიმალური ბრძოლა. ჩვენ არ შევჩერდებით და გამოვიყენებთ ჩვენი ჯანდაცვის სისტემის სრულ პოტენციალს“,- აღნიშნავს მინისტრი გამოცემასთან.
ჯანდაცვის სამინისტროს ცნობით, სტატიაში ხაზგასმულია, რომ საქართველო მიჰყვება იაპონიის და სამხრეთ კორეის, კორონავირუსის კრიზის პრევენციის, წარმატებულ მოდელს.
„აპლიკაცია ავსტრიულმა არასამთავრობო ორგანიზაციამ NOVID20-მა პროგრამული უზრუნველყოფის მოწინავე კომპანიასთან Dolphin Technologies-თან ერთად შეიმუშავა. აპლიკაცია, Rocket Media Communications მეშვეობით, ლიცენზიის საფასურის გადახდის გარეშე, ხელმისაწვდომი ხდება მსოფლიოს მასშტაბით სხვადასხვა ქვეყნის მთავრობისთვის. მაღალი სიზუსტის უზრუნველყოფის მიზნით, აპლიკაცია NOVID20-ის მოქმედება დაფუძნებულია ისეთ თანამედროვე ტექნოლოგიებზე, როგორიცაა Bluetooth. მონაცემთა დაცვის უმკაცრეს გაიდლაინებთან თანხვედრით და ანონიმურობის სრული დაცვით, აპლიკაციის გამოყენება, ინფექციის მილიონობით შემთხვევების თავიდან აცილების შესაძლებლობას იძლევა“, – ნათქვამია სტატიაში.
აპლიკაციის STOP COVID პრეზენტაცია 16 აპრილს შედგა. მისი მიზანი Covid-19-ის ადრეული გამოვლენა და პრევენციაა.
„აპლიკაცია ხელმისაწვდომია iOS & Android-ის მომხმარებლებისთვის და იძლევა საშუალებას შევაკავოთ ვირუსის გავრცელება კონტაქტირებული პირების დროული ინფორმირებით. აპლიკაციის გადმოსაწერად iOS-ის მომხმარებელმა App Store-ზე უნდა ჩაწერონ STOP COVID, ხოლო ანდროიდის მფლობელებს, მისი გადმოწერა Google Play-დან შეუძლიათ NOVID20-ის დასახელებით. დამატებით გადმოსაწერი ლინკები განთავსებულია ჯანდაცვის სამინისტროს ვებ-გვერდზე www.moh.gov.ge და ასევე მთავრობის მიერ შექმნილ სპეციალურ ვებ-გვერდზე https://stopcov.ge/“ – ნათქვამია სამინისტროს ინფორმაციაში.