ქართველმა ექიმმა ბექა ბახტაძემ, რომელიც ამერიკის შეერთებულ შტატებში მუშაობს და რომელიც ტანერის სამედიცინო ცენტრის ექიმ-რეანიმატოლოგია, “დღის კურიერის” ეთერში განაცხადა, რომ COVID 19-ის ინფექციას თავისი სპეციფიკა და მოსალოდნელი საფრთხეები აქვს.
როგორც ექიმმა აღნიშნა, COVID 19-ით ინფიცირებული პაციენტების 20%-ს კრიტიკული მედიცინის ჩარევა ესაჭიროებათ, რაც მნიშვნელოვნად განასხვავებს ამ ვირუსს ჩვეულებრივი, სეზონური, გრიპის ვირუსისგან. მისივე თქმით, სეზონური გრიპისგან COVID 19-ს განასხვავებს ისიც, რომ ამ დაავადების საწინააღმდეგო სპეციფიკური პრეპარატი არ არსებობს.
“ეს დაავადება მხოლოდ გრიპი არ არის. თუ ვინმე მაგას ამბობს, ეს არის სრული სისულელე. ის გვნებს თქვენც და ვნებს საკუთარ თავსაც. ეს ჩვეულებრივი გრიპი, დღესდღეობით, არ არის. თუნდაც იმიტომ, რომ არ გვაქვს მედიკამენტი ამ დაავადების სამკურნალოდ, გარდა ჩვეულებრივი დახმარებითი ჩარევისა, რასაც ვაკეთებთ სხვა დაავადებებშიც. პლუს ამას, სამედიცინო სფეროს წარმომადგენლებიც შეიძლება გახდნენ თავად წყარო. ასეთი გრიპის დროს არ ხდება,“- განაცხადა ექიმმა.
ბექა ბახტაძემ ისაუბრა საქართველოს მართლმადიდებლური ეკლესიის გადაწყვეტილებაზეც, რომლის თანახმადაც სადღესასწაულო ღვთისმსახურება მრევლთან ერთად ჩატარდება. ექიმმა ხაზი გაუსვა, რომ დიდი რაოდენობით მრევლის წევრებს შორის საჭირო დისტანციის დაცვა, შეუძლებელი იქნება.
“აქ არ არის საუბარი უშუალოდ ინსტიტუციაზე ან ვინმეს რელიგიურ ხედვაზე, აქ არ არის საუბარი ურწმუნოსა და მორწმუნეს შორის, საუბარია უშუალოდ შენობაზე, სადაც იკრიბება ხალხი, სადაც ვენტილაცია არ არის საკმარისი. ასევე, ვერავინ დამაჯერებს, რომ 2000 და 3000 კაცი დისტანცირებას მოახდენს, თუნდაც 12 და 15 საათის განმავლობაში და ერთმანეთს არ შეეხებიან. ჩემი, როგორც ექიმის და მეცნიერის პოზიცია არის მყარი, და მოვუწოდებ ნებისმიერ სხვა ექიმს საქართველოში, გამოხატოს ძალიან მკაფიო მესიჯი, რომ აუცილებელია სახლში დავრჩეთ. არავინ იცის დღეს, რომ თუნდაც ის 2 მეტრიანი დისტანცია 100%-ით იცავს ხალხს. რა თქმა უნდა, უკეთესია ვიდრე ფიზიკური კონტაქტი, მაგრამ სახლში დარჩენაზე უკეთესი იარაღი არც ერთი ქვეყნის ჯანდაცვის სისტემას არ აქვს,“-განაცხადა ბექა ბახტაძემ.
როგორც ექიმმა აღნიშნა, ინფექციის გავრცელების პიკის მიღწევა ყველაზე ცუდის უკან მოტოვებას არ ნიშნავს და მნიშვნელოვანია, პიკი ძალიან დიდი მასშტაბის არ იყოს.
“მგონი იმ ზღაპრების არავის სჯერა, რომ საქართველოს აქვს ის რესურსი, რომელიც საკმარისი იქნება თუ ეს დაავადება უკონტროლო გახდა, მისი გამკლავება მოახდინოს.
პიკის მოდელირება ხდება ყოველდღიურ მონაცემებზე დაყრდნობთ. ჩვენ თუ ხვალ გვექნება 200 ახალი შემთხვევა, ეს პიკი სრულიად სხვანაირი შეიძლება გახდეს
პიკზე მისვლა არ ნიშნავს, რომ ყველაფერი მორჩა, მთაზე ასვლა და ჩამოსვლა დაახლოებით ერთი და იგივე სირთულესთანაა დაკავშირებული. პიკის შემდეგ შემთხვევების რაოდენობა მცირედ იკლებს, ეს არ ნიშნავს იმას, რომ ყველაფერი უკან მოვიტოვეთ და გარეთ გამოვიდეთ,”– განაცხადა ექიმმა.