ინფექციურ საავადმყოფოში აშშ-ში მოღვაწე ქართველი ექიმის, ზურაბ გურულის განცხადებას კარანტინში მყოფი ახალგაზრდა პაციენტების „პლაქვენილით“ მკურნალობის შესახებ 100%-იან ტყუილს უწოდებენ.
როგორც სამედიცინო დაწესებულების მიერ გავრცელებულ განცხადებაშია ნათქვამი, კორონავირუსის მკურნალობის ქართული პროტოკოლი საერთოდ არ ითვალისწინებს კარანტინში მყოფი პირების მკურნალობას და თუ კარანტინში მყოფი რომელიმე პირი თავისი ინიციატივით საპროფილაქტიკოდ იღებდა „პლაქვენილს“, კლინიკამ ამის შესახებ არაფერი იცის.
„ვფიქრობთ, ზურაბ გურულთან და მის „უბრალოდ პატიოსან კოლეგებთან“ და „პატიოსან ადამიანებთან“ დაკავშირებით ყველაფერი გარკვეულია და ყველა ყველაფერს ხვდება – მათ უბრალოდ „სხვისი აშენებული ქვეყანა არ უნდათ“, მაგრამ მაინც გვინდა ერთ ფაქტზე გავამახვილოთ ყურადღება, რომელიც ზურაბ გურულის პირველ პოსტში არ იყო და მხოლოდ საპასუხო წერილში გაჩნდა.
ის ამბობს, რომ „რამდენიმე უაღრესად საგანგაშო წერილი მიიღო“ კარანტინში მყოფი ახალგაზრდა პაციენტების შესახებ, რომლებიც „პლაქვენილით“ მკურნალობდნენ – კიდევ ერთი 100%-იანი ტყუილი.
კორონავირუსის მკურნალობის ქართული პროტოკოლი საერთოდ არ ითვალისწინებს კარანტინში მყოფი პირების მკურნალობას, რამდენადაც კარანტინში მხოლოდ ჯანმრთელი პირები არიან და არა ავადმყოფები.
თუნდაც უსიმპტომო ავადმყოფები და ახლა თუ კარანტინში მყოფი რომელიმე ახალგაზრდა თავისი ინიციატივით საპროფილაქტიკოდ იღებდა პლაქვენილს (რაც ძალიან საეჭვოა) და თან ამის შესახებ ზურაბ გურულს აცნობებდა, ეს მათი საქმეა და ჩვენ ამის შესახებ არაფერი ვიცით. ჩვენს პროტოკოლში შავით თეთრზე ცალსახად წერია, რომ „კატეგორიულად დაუშვებელია ამ მედიკამენტის გამოყენება კორონავირუსის საპროფილაქტიკოდ“.
რაც შეეხება ზურაბ გურულის მიერ ნახსენებ „ერთ-ერთ ყველაზე ცნობილ ახალგაზრდა პაციენტს“, რომელმაც „საჯაროდ ინტერვიუში განაცხადა“, რომ „პლაქვენილს“ იღებდა სამკურნალოდ (მის სახელს და გვარს ზურაბ გურულის ერთ-ერთი თანამოაზრე ასაჯაროვებს), მას სინამდვილეში ჰქონდა კორონავირუსის არა უსიმპტომო ფორმა, არამედ კომპიუტერული ტომოგრაფიით დადასტურებული ორმხრივი პნევმონია და მან კლინიკაში და არა კარანტინში 26 დღე გაატარა“, – აღნიშნულია სამედიცინო დაწესებულების განცხადებაში