3 აპრილიდან ამოქმედებულია ერთლარიანი მედიკამენტების მეორე, ალტერნატიული პროგრამა და ყველა იმ პაციენტს, ვისაც აქვს ქრონიკული დაავადება და ამ პროგრამით სარგებლობდა, შეუძლია, დაუყოვნებლივ ისარგებლოს ახალი პროგრამით, – ამის შესახებ საქართველოს ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის მინისტრმა, ეკატერინე ტიკარაძემ წამლების ფასისა და ერთლარიანი მედიკამენტების პროგრამის შესახებ დასმულ კითხვაზე განაცხადა.
„წინა წელს ვისაუბრეთ ამ პროგრამის პრობლემატიკაზე და მოსახლეობას არაერთხელ განვუმარტეთ, რომ ვმუშაობდით ახალ პროგრამაზე. 3 აპრილიდან უკვე ამოქმედებულია ერთლარიანი მედიკამენტების მეორე, ალტერნატიული პროგრამა და ყველა იმ პაციენტს, ვისაც აქვს ქრონიკული დაავადება და ამ პროგრამით სარგებლობდა, შეუძლია, დაუყოვნებლივ ისარგებლოს ამ ახალი პროგრამით, რომელიც ეფუძნება როგორც ელექტრონულ რეცეპტს, ასევე მკაცრად კონტროლდება მათი ექიმების მხრიდან და ჩვენ გვაქვს მუდმივად მონიტორინგის საშუალება“, – განაცხადა ეკატერინე ტიკარაძემ.