მარნეულის ცხელების კლინიკის დირექტორის, იოსებ მგალობლიშვილის განცხადებით, მიუხედავად იმისა, რომ ე.წ. „მარნეულის კლასტერის“ წარმომქმნელი ქალი უკვე გამოჯანმრთელებულია, მისი კონტაქტების ძიება კვლავ გრძელდება. ამის შესახებ იოსებ მგალობლიშვილმა „დღის ქრონიკასთან“ საუბრისას განაცხადა.
„ეს პროცესი წარმატებით მიმდინარეობს. გარდა კონტაქტების გამოკვლევისა, გადამოწმდა მასთან შეხებაში მყოფი სამედიცინო პერსონალი და იმ დროს კლინიკაში მყოფი სხვა პაციენტები. საბედნიეროდ, ვირუსი არც ერთს დაუდგინდა. ჩემი აზრით, ეს როგორც ჩვენი პერსონალის, ასევე – საუნივერსიტეტო კლინიკაში ამ პაციენტის მკურნალი ადამიანების მაღალი კვალიფიკაციის ერთ-ერთი საუკეთესო მაგალითია. ისეთი მძიმე პაციენტი, რომელიც მართვით სუნთქვაზე თბილისში გადავიყვანეთ, დღეს გამოჯანმრთელებულია და სახლის პირობებში აგრძელებს ცხოვრებას“, – განაცხადა იოსებ მგალობლიშვილმა.