“სააკაშვილის ანტიკორუფციული რეფორმების საფასური იყო ქუჩებში მოკლული ათობით ახალგაზრდა, ციხეებში წამება, ბიზნესის წართმევა, ძალადობრივი რეჟიმის ჩამოყალიბება”

2003 წელს საქართველოში ბევრ ადამიანს, მათ შორის მე და ჩემს მეგობრებს გვჯეროდა, რომ სააკაშვილმა თავისი რადიკალურობით რეალურად მნიშვნელოვანი რეფორმები გაატარა, თუმცა მალევე ყველაფერი გავიგეთ და აღმოჩნდა, რომ ე.წ. ანტიკორუფციული რეფორმების საფასური ათობით ახალგაზრდა იყო, რომელიც ქუჩებში დახვრიტეს. ამის საფასური ასევე იყო მედიის მონოპოლიზაცია, ბიზნესის წართმევა, ციხეებში წამება, პოლიტიკური ოპონენტების დევნა და რაც მთავარია, ძალადობრივი რეჟიმის ჩამოყალიბება, – ამის შესახებ თბილისის მერმა 112 Украина-ს გადაცემა Live шоу-ში განაცხადა.

როგორც კახა კალაძემ აღნიშნა, საბოლოო ჯამში აღმოჩნდა, რომ ამის საფასური იყო ძალაუფლების შენარჩუნება და გაძლიერება, მოწინააღმდეგების მოშორება და კომფორტის ზონის გაფართოება.

„სააკაშვილს მოქმედება მხოლოდ ავტორიტარული სისტემის პირობებში შეუძლია. დემოკრატიის პირობებში ის მარგინალი ხდება. ამიტომაც ყველა ყურადღბით უნდა დაფიქრდეს, ღირს თუ არა ძალადობრივი რეჟიმის შექმნა სააკაშვილთან დაკავშირებული ავანტიურული გეგმების განსახორციელებლად. მას ყოველთვის სურს აბსოლუტური ძალაუფლება. ეს კი ნიშნავს, რომ ის ყველაფერს გააკეთებს, ყველაფერზე წავა, რათა აბსოლუტური ძალაუფლება მიიღოს. თუ უკრაინა მას ნებისმიერ თანამდებობაზე დანიშნავს, საბოლოო ჯამში ყველაფერი ცუდად დასრულდება. ასეთია მისი ბუნება. ასეთი ადამიანია. ზუსტად ეს მაწუხებს, როგორც თქვენი ქვეყნის და თქვენი ხალხის ერთ-ერთ თაყვანისმცემელს“, – განაცხადა კახა კალაძემ.