“ნიკა მჭედლიძეს ჩემი შვილისთვის დედა შეუგინებია, ამას მოჰყვა ინციდენტი და ამ დროს გალახა ჩემმა ბიჭმა ნიკა მჭედლიძე“, – ამის შესახებ „აიპრესს“ გუშინ მოხდარი ინციდენტის კომენტირებისას ინციდენტში მონაწილე გიორგი ჩილაშვილის მამამ ვაჟა (ივანე) ჩილაშვილმა განუცხადა.
მისივე თქმით, ნიკა მჭედლიძის დედა მას სახლში მიუვარდა და მეორე ინციდენტი მის სახლში მოხდა.
„მე 67 წლის კაცი ვარ. არც ერთ პარტიას არ ვეკუთვნი. პოლიტიკა არ მაინტერესებს და ნურავინ ეცდება ამაში ჩემს გარევას.
გუშინ მე და ჩემს 2 წლის შვილიშვილს გვეძინა, საწოლში ვიწექით. ამ დროს ისმის წივილ-კივილი ჩემს სახლში. შემოვარდა ეს ქალბატონი მირაშვილი ნელი და ატეხა მთელი ამბები. არადა მეზობლები ვართ, ცუდი ურთიერთობა არ გვქონია. გამოვედი ვითარების გასარკვევად, ვკითხე რაშია საქმე-მეთქი და მითხრა, რომ შენმა ბიჭმა ჩემი ბიჭის სცემაო. მე ვუთხარი მორიგდებიან, დაწყნარდი-მეთქი. ცივი წყალი მოვუტანე დალიე-თქო, მაინც არ დამშვიდდა. ჩემი შვილი და მეზობელი იყვნენ სახლში, მათ მივარდა და სკამი ესროლა. ისეთ უწმაწურ სიტყვებს ამბობდა კაციც რომ არ იტყვის. ამ დროს მეც გავბრაზდი და ვუთხარი გაეთრიე ჩემი სახლიდან-მეთქი. მერე ხელისც მოვკიდე და ასე მივმართე გაბრძანდი, გაეთრიე-მეთქი. ამ დროს ჩემი ბიჭი და მეზობელი მანქანაში ჩასხდნენ და მიდიოდნენ, მანქანას ფეხები დაუშინა. ბიჭებს ვედრო ესროლა, მერე ეს ვედრო მე მესროლა, პლასტსმასის ვედრო“, – აცხადებს ვაჟა ჩილაშვილი.
იგი ამბობს, რომ უშუალოდ ინციდენტს თავად არ შესწრებია, თუმცა გადმოცემით იცის რომ ეს ყველაფერი პროვოცირებული იყო.
„გასულები იყვნენ. ღორებისთვის ქატო მოჰქონდათ და „ნაცმოძრაობის“ ოფისის წინ მანქანას გადაუდგა მირაშვილის ბიჭი ნიკა მჭედლიძე. გააჩერა და რაღაცაზე ვერ შეთანხმდნენ. რაზე ვერ შეთანხმდნენ ეს მე არ ვიცი. მერე ჩემი ბიჭისთვის დედა შეუგინებია. ამ დროს ჩემი ბიჭი გადმოსულა მანქანიდან და გაულახია. ეს ვიცი გადმოცემით, პირადად მე ამ ინციდენტს არ შევსწრებივარ“, – აღნიშნავს ჩილაშვილი, რომელიც ნუგზარ წიკლაურის განცხადებასაც პასუხობს:
„გამოვიდა ნუგზარ წიკლაური და გაიძახის ეგეც დაიჭირეთ კრიმინალიაო. რას ლაპარაკობს? მე რეციდივისტი ვარ? თან გაიძახის თურმე 20 წლის გოგოზე მიძალადია და დამიჭრია. რას ლაპარაკობს? ან ნამუსი აქვს ან სინდისი?! ადამიანია საერთოდ?!“ – განუცხადა „აიპრესს“ ვაჟა ჩილაშვილმა.
შეგახსენებთ, რომ “ნაციონალური მოძრაობის” წევრმა ნუგზარ წიკლაურმა გუშინ განაცხადა, რომ მათ წევრზე თავდასხმა გარდაბნის მუნიციპალიტეტში, სოფელ გამარჯვებაში მოხდა, მოგვიანებით “რუსთავი 2”-ის ეთერში “ნაციონალური მოძრაობის” წევრმა გიორგი კანდელაკმა განაცხადა:
“თეთრი წყაროს და გარდაბნის ოლქებში ჩვენი მაჟორიტარობის კანდიდატის ნუგზარ წიკლაურის შტაბის წინ მოიჭრა ქართული ოცნების ორი წევრი, ჩვეულებრივი კრიმინალები, ლაშა ხაჭვანი და გიორგი ჭილაშვილი, რომლებიც ცივი იარაღის გამოყენებით თავს დაესხნენ ნაციონალური მოძრაობის ადგილობრივი ახალგაზრდული ორგანიზაციის თავმჯდომარეს და მის დას. მათ დაჭრეს ნიკა მჭედლიძე და ცემეს მისი და”.
მომხდარ ინციდენტთან დაკავშირებით, განცხადება გაავრცელა შსს-მ. უწყება დაჭრის ფაქტს გამორიცხავს.
www.ipress.ge