შაქარაშვილის საქმეზე მიმდინარე სასამართლო პროცესი გადაიდო. აღნიშნული გადაწყვეტილება მას შემდეგ მიიღეს, რაც არასრულწლოვანმა ბრალდებულმა ზ.ხ.-მ ჯანმრთელობის გაუარესების გამო სხდომა დატოვა.
მასთან ერთად პროცესი დატოვა ბრალდებულის ადვოკატმა, გიორგი გელხაურმაც, რომელმაც მედიასთან განაცხადა, რომ მიუხედავად იმისა ზ.ხ თავს შეუძლოდ გრძნობდა სასამართლომ პროცესი არ შეწყვიტა, რის შემდეგაც ბრალდებული ხელახლა გახდა შეუძლოდ.
“მას გაუზომეს წნევა და სასწრაფო სამედიცინო სამსახურის ეკიპაჟმა სასამართლოს განუცხადა, რომ ზ.ხ. თავს გრძნობდა კარგად. ზ.ხ.-ს ჰქონდა თავბრუსხვევა, ხელ-ფეხი ჰქონდა დაბუჟებული, პროკურატურამ მოითხოვა პროცესის გაგრძელება, რაც გაიზიარა სასამართლომ და იგი აპირებდა სხდომოს გაგრძელებას. ამის შემდეგ, ზ.ხ.-მ დატოვა პროცესი, ვინაიდან იგი ისევ გახდა ცუდად და მე მითხრა, რომ მასთან ერთად დამეტოვებინა პროცესი და არ მიმეღო ამ ფარსში მონაწილეობა”, — აცხადებს გელხაური.
ადვოკატის ცნობით, ზ.ხ სასჯელაღსრულების დაწესებულებაში გადაიყვანეს და ის კვლავ აგრძელებს შიმიშილობას.
სხდომის გადადების შეხასებ კი ჟურნალისტებს, სხვა ადვოკატებმა აცნობეს. ერთ-ერთი ბრალდებულის ლ.შ.-ს ადვოკატმა, ზაქრო გვიშიანმა განაცხადა ისიც, რომ ზ.ხ.-ს დაუნიშნეს საზოგადოებრივი ადვოკატი, რომელიც მომდევნო პროცესზე გამოცხადდება.
“სასამართლოს მხრიდან მოხდა მიმართვა და დაინიშნა საზოგადოებრივი ადვოკატი, რომელიც მიიღებს მონაწილეობას ზ.ხ.-ს ინტერესების დაცვაში. ბრალდების მხარემ ჩათვალა, რომ ადგილი ჰქონდა პროცესის გაჭიანურებას, სასამართლომაც გაითვალისწინა ეს და დაუნიშნა საზოგადოებრივი ადვოკატი. ჩვენ ამას არ ვიზიარებთ, რადგან პროცესის დატოვების წინაპირობა იყო ცუდად გახდომა, შიმშილობის დაწყება და არანაირი საფუძველი პროცესის გაჭიანურების არ ყოფილა”, – აცხადებს ადვოკატი.
გიორგი შაქარაშვილის საქმეზე, დღეს, 21 აგვისტოს მცხეთის რაიონულ სასამართლოში, საქმის მოწმეების დაკითხვა უნდა დაწყებულიყო, თუმცა ადვოკატების თქმით, ვერცერთი მოწმის დაკითხვა ვერ მოესწრო.
შაქარაშვილის საქმეზე დაკავებული 6 არასრულწლოვნის საქმე გამოძიებამ ცალკე გამოყო. მათგან ოთხს — ნ.ც.-ს; ლ.შ.-ს; ნ.ქ.-ს და გ.მ.-ს გამოძიება ედავება ჯგუფური ძალადობის ორგანიზებას, ძალადობაში მონაწილეობასა და თავისუფლების უკანონო აღკვეთას. ხოლო მათგან ორს — ზ.ხ.-ს და ა.ქ.-ს გარდა ამ მუხლებისა, გამოძიება ედავება განზრახ ჯგუფურად ჩადენილ მკვლელობას.
პროკურატურამ შაქარაშვილის საქმეზე ბრალდებულ ხუთ ადამიანს ბრალი 11 აგვისტოს დაუმძიმა. ვახტანგ ჩიქოვანს, ნიკოლოზ რევაზიშვილს, არჩილ გაგნიძესა და არასრულწლოვნებს: ზ.ხ.-და და ა.ქ.-ს გამოძიება დამამძიმებელ გარემოებებში განზრახ მკვლელობას ედავება. კერძოდ, პროკურატურა ამბობს, რომ მათ გიორგი შაქარაშვილი სცემეს და შემდეგ მდინარეში გადააგდეს, რა დროსაც ის გარდაიცვალა.