რაც შეეხება „გირჩის“ მდგომარეობას, ეს არის საკითხი, რომელიც საზოგადოებამ უნდა განსაჯოს, მე შეფასება არ მაქვს. ყოველთვის ვამბობდი, რომ ეს არის დესტრუქციული ძალა, თავისი შინაარსით, თავისი პათოსით და იმ ლიდერით, რომელიც ყოველთვის აცხადებდა, რომ „ნაციონალურ მოძრაობას“ არაფერზე სანანებელი არ აქვს და არაფერი ჩაუდენია ისეთი, რაზეც ბოდიში უნდა მოიხადოს, – ამის შესახებ საქართველოს პარლამენტის პირველმა ვიცე-სპიკერმა, გია ვოლსკიმ „გირჩი არსებულ დაპირისპირებაზე განაცხადა.
მისი თქმით, „გირჩი“ ახალგაზრდებს ჭაობში ითრევს.
„მოწყვლად ჯგუფს ახალგაზრდებისას ითრევენ ჭაობში, რომელშიც თვითონ არ სხედან და თვითონ არიან ხმელეთზე მოკალათებული. ესენი შიგნით ერთმანეთს რას დაელაპარაკებიან და რა პრეტენზიებს დაუყენებენ, არ ვიცი. ყველა ერთად იყო მაშინ, როდესაც მტრის წინაშე შარვალი ჩაიხადეს. დღეს რას გააკეთებენ, რა პათოსით და რა პოზიციებით განსხვავდებიან ერთმანეთისგან, ესეც არ მესმის“, – განაცხადა ვოლსკიმ.
სოციალურ ქსელში ვრცელდება ზურაბ ჯაფარიძის მორიგი განცხადება, სადაც აღნიშნულია, რომ იაგო ხვიჩიას, ვახტანგ მეგრელიშვილს და სანდრო რაქვიაშვილს ცივილიზებული ფორმით დაშორება შესთავაზა, პასუხად კი, მიიღო რჩევა, „დაოკებულიყო“. ამასთან ჯაფარიძემ საკუთარ მხარდამჭერებს შესთავაზა, გამოკითხვის საშუალებით მათ გადაწყვიტონ, ვის დარჩება სახელი „გირჩი“ და პარტიის ფეისბუქის გვერდი.