„ნაციონალური მოძრაობის“ თავმჯდომარე ნიკა მელია „საქართველოს ბანკის“ ხელმძღვანელობას მიმართავს, გაითვალისწინონ, რომ იმ შემთხვევაში, თუ მის ანგარიშზე გირაოს გადახდა მოხდება, ამით მისი უფლებები დაირღვევა.
ნიკა მელია იმედოვნებს, რომ „საქართველოს ბანკი“ კანონის დარღვევის მონაწილე არ გახდება.
„ანგარიში, რომელზეც თითქოს თანხის შეტანა უნდა მოხდეს, ეკუთვნის “საქართველოს ბანკს“. ამ ანგარიშზე შესაბამის თანხას ვერავინ ვერ შეიტანს, თუ არ ექნება უნიკალური კოდი, რომელიც აქვს პროკურატურას. მინდა, თხოვნით, პატივისცემით მივმართო საქართველოს ბანკს, თუკი მოხდება შესაბამის ანგარშზე ჩემ სასარგებლოდ გირაოს გადახდა, ეს იქნება ჩემი უფლებების შელახვა. მოგმართავთ თხოვნით, რომ ეს არის არა მხოლოდ უფლების დარღვევა, არამედ კანონის დარღვევაც. ამიტომ, იმედია, ამის მონაწილე არ გახდება ჩემთვის საპატივცემულო საბანკო დაწესებულება – საქართველოს ბანკი. მივმართავ საქართველოს ბანკის ხელმძღვანელობას, ძალიან გთხოვთ, ეს ყველაფერი გაითვალისწინოთ“, – განაცხადა ნიკა მელიამ.
შეგახსენებთ, „ჯგუფური ძალადობის ხელმძღვანელობის და მასში მონაწილეობისთვის“ სისხლის სამართლის პასუხისგებაში მიცემულ ნიკა მელიას თბილისის საქალაქო სასამართლომ 2019 წლის 27 ივნისს აღკვეთის ღონისძიების სახით შეუფარდა 30 000-ლარიანი გირაო და დამატებით შემზღუდავი ღონისძიებები, მათ შორის, გამოყენებულ იქნა ელექტრონული მონიტორინგი.
თუმცა, 2020 წლის პირველ ნოემბერს, საზოგადოებრივი თავშეყრის ადგილას საჯარო განცხადების გაკეთებისას, ნიკა მელიამ ელექტრონული მონიტორინგისთვის განკუთვნილი სამაჯური მოიხსნა.
ამის შემდეგ პროკურატურამ შეფარდებული აღკვეთის ღონისძიების გამკაცრება მოითხოვა. სასამართლოს 2020 წლის 3 ნოემბრის განჩინებით, ნიკა მელიასთვის აღკვეთის ღონისძიების სახით შეფარდებული გირაოს თანხა 40 000 ლარით გაიზარდა. გადახდის ვადად მელიას 50 დღე განესაზღვრა