ქუთაისი- სამტრედიის შემოვლით გზაზე მომხდარი ავტოავარიის დროს დაშავებული მორაგბე გიორგი ლომინაძე და მისი მეუღლე ნუცა გუნცაძე ჯერ კიდევ რეაბილიტაციის კურსს გადიან.
ამის შესახებ მორაგბის ძმამ დადუ ლომინაძემ „სარკესთან“ ინტერვიუში ისაუბრა.
„გიორგიც და ნუცაც სახლში არიან. ჯერ კიდევ რეაბილიტაციის კურსს გადიან. გიორგის მუხლში სახსარი იყო ჩახურული. ჯერ კიდევ არ ვიცით, ცალი ფეხი დაუმოკლდა თუ არა. როცა ძვალი კარგად შეხორცდება, მერე გადაწყდება ოპერაცია კიდევ უნდა ჩაუტარდეს თუ არა.
ნუცას ცალი მხარე პარალიზებული აქვს. როგორც გვითხრეს, მის ტრამვებს ინსულტიც დაემატა. აღდგენადია თუ არა ეს პარალიზება, ჯერ არ ვიცით და ისრაელიდან და გერმანიიდან პასუხებს ველოდებით. შეიძლება ნერვის გადანერგვა გახდეს საჭირო“, – აღნიშნავს მორაგბის ძმა.
ამასთან, დადუ ლომინაძემ „სარკესთან“ თურქეთის კლინიკაში მომხდარი ფაქტიც გაიხსენა, როდესაც ეტლშიმჯდარმა გიორგიმ მეუღლეს პალატაში ყვავილებით მიაკითხა.
„გიორგი და ნუცა თურქეთის კლინიკაში სხვადასხვა სართულებზე იწვნენ. ორივეს მოძრაობა აქვს შეზღუდული. ჩემს ძმას ცოტა უკეთესი მდგომარეობა აქვს – ეტლში ზის და ისე დადის სხვების დახმარებით. გიორგი და ნუცა იქ ერთმანეთს ვერ ნახულობდნენ. მას მეუღლის ნახვა ძალიან უნდოდა. მთხოვა, იქნებ ყვავილები იშოვოო. გიორგის სახე საშინელ დღეში აქვს, სულ ჩაშავებულია და სათვალე გაიკეთა. ეტლში გადავსვი სხვების დახმარებით და ნუცას პალატაში შევიყვანეთ.უზომოდ ემოციური შეხვედრა იყო“, – აცხადებს დადუ ლომინაძე.