რესპუბლიკურ საავადმყოფოში გარდაცვლილი 20 წლის ფეხბურთელის შესახებ კლინიკის ერთ-ერთი ექიმის შვილი, ქეთა ბაღაშვილი სოციალურ ქსელში ემოციურ პოსტს აქვეყნებს.
„დედაჩემი ექიმია, რესპუბლიკურში ყოველ დღე 20 პაციენტის სიცოცხლეს დარაჯობს. ბოლო ერთი თვეა ყოველ საღამოს ფეხზეძლივსმდგომი ყვება ჩემი ძმისხელა, 20 წლის ფეხბურთელი ბიჭის შესახებ, რომლის ანკეტის კითხვითაც იწყება დედაჩემის დილა საავადმყოფოს კედლებში.
რომელიც სპორტული სიჯიუტით ებრძვის სიკვდილს, მაგრამ რეანიმაციაში სხვა პაციენტებს ადგილს მაინც არ უთმობს, არ აძლევს ეს საშინელი დაავადება სუნთქვის უფლებას. მეორე განყოფილებიდან მომაკვდავი დედა, რომელსაც თავისი წილი ჰაერიც არ აქვს ფილტვებში, რეკავს და შვილის ამბავს კითხულობს, ალბათ ბოლო ამოსუნთქვას გადაულოცავდა ნებისმიერ წამს, რომ შეეძლოს.
მეძახის წეღან დედა და ცრემლები ასკდება თვალებში. ვერ გამოსტაცეს ეს ბიჭი სიკვდილს, ვერ უწილადა დედამ დარჩენილი ჰაერი, დილით დედაჩემი მის ანკეტას აღარ გაეცნობა. წავიდა. კიდევ ერთი ადამიანი გადაიქცა ციფრად – წერს ქეთა.