დღეს 1-ელი ოქტომბერი, ძალიან მნიშვნელოვანი დღე ჩვენი ქვეყნის უახლოეს ისტორიაში – ზუსტად 9 წლის წინ ამ დღეს საქართველოში მოხდა დემოკრატიული გარდატეხა და ამ 9 წლის განმავლობაში ქვეყანამ განიცადა უპრეცედენტო წინსვლა ყველა მიმართულებით, – ამის შესახებ „ქართული ოცნების“ თავმჯდომარემ ირაკლი კობახიძემ ჟურნალისტებს განუცხადა.
მისივე თქმით, ხვალინდელ არჩევნებზე ქართველმა ხალხმა კიდევ ერთხელ უნდა გამოხატოს თავისი ნება.
„რა თქმა უნდა, გვემუქრებიან მოძალადეები და მოღალატეები კოალიციური მთავრობით და ა.შ, თუმცა ხვალ არის ადგილობრივი თვითმმართველობის არჩევნები და მნიშვნელოვანია საზოგადოების მობილიზაცია, რომ დაფიქსირდეს სათანადო შედეგი იმისთვის, რომ გაგრძელდეს ადგილობრივი თვითმმართველობის შემდგომი განვითარება და მოწესრიგდეს ის საკითხები, რომელიც ჩვენ მოსახლეობას აწუხებს“, – აცხადებს კობახიძე.