მიხეილ სააკაშვილსა და „ნაციონალური მოძრაობის“ სექტის წარმომადგენლებს დაგეგმილი აქვთ არეულობა, რაც, დარწმუნებული ვარ, არ გამოუვათ,- ამის შესახებ პოლიტიკოსმა, საგანგებო და სრულუფლებიანმა ელჩმა, მეცნიერებათა დოქტორმა და ყოფილმა პოლიტიკურმა დევნილმა გიგლა ბარამიძემ „ქრონიკასთან“ ისაუბრა.
„მიხეილ სააკაშვილსა და „ნაციონალური მოძრაობის“ სექტის წარმომადგენლებს დაგეგმილი აქვთ არეულობა, რაც, დარწმუნებული ვარ, არ გამოუვათ. აბსოლუტურად დღევანდელობის კონტექსტს ესადაგებოდა პრემიერის მიერ გავრცელებული წერილი, იმიტომ რომ იქ ახსნილია, თუ რა საფრთხეები აიცილა საქართველომ და რა შეიძლებოდა მომხდარიყო. მე „ქართული ოცნების“ წევრი არ ვარ. მე ვარ ჯანსაღი დამოუკიდებელი ოპოზიციონერი, მაგრამ არ შემიძლია არ ვთქვა, რომ ჩვენი დღევანდელი პრემიერის გადადგმული ნაბიჯები – ქარდავას ჩამოყვანა; სააკაშვილის ჩამოყვანა; მისი ნათქვამი ფრაზა, რომ მისი უფროსია არა ევროკავშირი, არამედ საქართველო და ქართველი ხალხი – არის ის, რასაც ჩვენ დიდი ხანია ველოდით. აქედან გამომდინარე, მე მხოლოდ სიმპათიით შემიძლია ვისაუბრო ამ ადამიანზე და იმ წერილზეც, სადაც ყოველგვარი სუბიექტურობის გარეშე არის ახსნილი ის, თუ რა ხდება საქართველოში, რა შეიძლება ყოფილიყო, რას წარმოადგენს „ნაციონალების“ სექტა და რამდენად საშიში და დამანგრეველი იყო ეს საქართველოსთვის. ამას წლების განმავლობაში ვამბობდით და ძალიან კარგია, რომ გვიან, მაგრამ ახლა დაესვა ამას ბეჭედი. ვიმედოვნებ, რომ ეს საარჩევნო ქმედება არაა და ქვეყანა დაისვენებს, სხვა ჯანსაღ ოპოზიციურ ძალებს კი მიეცემათ საშუალება, რომ ჩამოყალიბდნენ ორგანიზაციულად, ფინანსურად, რათა ქვეყანაში შეიცვალოს ოპოზიციის სივრცე და წარიმართოს სახელმწიფოებრივად საჭირო სწორი ოპოზიციური ქმედებები“, – განაცხადა გიგლა ბარამიძემ.