ძალიან ბევრი მესიჯი მივიღე გულისწყვეტასთან დაკავშირებით მათგან, ვისაც პირველ ტურშივე გამარჯვების ძალიან დიდი იმედი ჰქონდა. მეგობრებო, ეს პოლიტიკაა და არ უნდა გეწყინოთ. მე ამან კიდევ უფრო გამაძლიერა. კიდევ უფრო მეტი შემართებით ვარ, კიდევ უფრო მობილიზებული ვარ და ასევე, მინდა მივმართო ჩემს მხარდამჭერებს, მაქსიმალური მობილიზება იმისთვის, რომ 30 ოქტომბერს ჩვენ გავიმარჯვოთ ძალიან დიდი ანგარიშით, – ამის შესახებ პარტია „ქართული ოცნების“ თბილისის მერობის კანდიდატმა, კახა კალაძემ გადაცემაში „იმედი LIVE“ განაცხადა.
„მე არასოდეს დამიყვია საზოგადოება პოლიტიკური ნიშნით. ვინც ჩემი მხარდამჭერი არ არის, ვპირდები, რომ მათი მერიც ვიქნები. ეს ჩემი მოვალეობაა და მე ამ პრინციპებით ვცხოვრობ. ყველაფერს გავაკეთებ იმისთვის, რომ ჩემი ქალაქი იყოს ყველაზე განვითარებული, ყველაზე მოწესრიგებული, ყველაზე მწვანე, ყველაზე სუფთა, საცხოვრებლად კომფორტული და რაც მთავარია, კეთილდღეობა უნდა იგრძნოს ამ ქალაქში და ამ ქვეყანაში მცხოვრებმა თითოეულმა ადამიანმა“, – განაცხადა კახა კალაძემ.