თავდაპირველად, „გირჩი“ არა მარტო ნარკოტიკების მოხმარების დეკრიმინალიზაციას, არამედ ლეგალიზაციას ითხოვდა, რასაც გარკვეულ პოლიტიკურ ძალებს შორის დაპირისპირება მოჰყვა. ამის შემდეგ კი, „გირჩმა“ მოთხოვნა შეცვალა და ისინი ლეგალიზებას აღარ ითხოვდნენ, – ამის შესახებ იურიდიულ საკითხთა კომიტეტის თავმჯდომარემ, ეკა ბესელიამ გადაცემა 2030-ში სტუმრობისას განაცხადა.
„ჩვენ მხარი დავუჭირეთ იმას, რომ მსუბუქი ნარკოტიკების მომხმარებელი ციხეში არ უნდა გავუშვათ, მაგრამ ლეგალიზებასთან დაკავშირებით გადაწყვეტილება არ მიგვიღია. სამუშაო ჯგუფის შექმნის შემდეგ, ამ საკითხზე ახალ კოლეგებთან შემაჯამებელი კონსულტაცია გვექნება, რათა სწორი გადაწყვეტილება მივიღოთ. ვფიქრობ, მაინც იმ გზით უნდა წავიდეთ, რომ მსუბუქი ნარკოტიკების მოხმარებისთვის საპატიმრო სასჯელის გამოყენება გამოვრიცხოთ და ვიფიქროთ, რა ალტერნატივა არსებობს – ჯარიმა, სხვა ტიპის ღონისძიების შემოღება თუ რა“, – განაცხადა ბესელიამ.
ეკა ბესელიამ „გირჩის“ მიერ დაანონსებულ აქციასთან დაკავშირებითაც ისაუბრა, რომ 31 დეკემბერს ისინი მარიხუანას პირდაპირ ეთერში დარგავენ.
„როცა სახელმწიფოს მხრიდან დიალოგისა და სამუშაო პროცესის გახსნის მზაობა არსებობს, ასეთი ფორმით ურთიერთობა სწორი არ არის. კანონში გვიწერია, რომ ეს ქმედება დასჯადია და როცა „გირჩი“ თუ სხვა პოლიტიკური ორგანიზაცია ამბობს, რომ მე ამ კანონს შეგნებულად ვარღვევ, მათ უნდა იცოდნენ, რომ ამაზე პასუხისმგებლობა დადგება. კანონის დარღვევის შემთხვევაში, პასუხისმგებლობა ყველას მიმართ თანაბრად გავრცელდება. მათ წარმომადგენლებთან შეხვედრა მქონდა და სჯობს, სამუშაო ფორმატში გადავინაცვლოთ“, – განაცხადა ეკა ბესელიამ.