ეროვნული უსაფრთხოების საკითხებში აშშ-ის პრეზიდენტის მრჩეველმა, ჯეიკ სალივანმა განაცხადა, რომ რუსეთის სამხედრო ძალებს უკრაინაში შეჭრა ნებისმიერ მომენტში შეუძლიათ.
„რუსეთს უკრაინის წინააღმდეგ სამხედრო ქმედების განხორციელება ნებისმიერ მომენტში შეუძლია, ან ეს ორ კვირაში შეიძლება მოხდეს, ან რუსეთმა შეიძლება დიპლომატიური გზა აირჩიოს“, – აღნიშნა ეროვნული უსაფრთხოების საკითხებში აშშ-ის პრეზიდენტის მრჩეველმა.
ჯეიკ სალივანის თქმით, აშშ მოკავშირეებთან და პარტნიორებთან ერთად მზად უნდა იყოს და მზად არის ნებისმიერი გაუთვალისწინებელი სცენარისთვის. ჯეიკ სალივანმა ასევე აღნიშნა, რომ აშშ-ის ოფიციალურმა პირებმა მოკავშირეებს უკრაინაში ომის გაჩაღების შესაძლებლობის შესახებ აცნობეს.
„თუ ომი დაიწყება, ეს უკრაინას უზარმაზარ ადამიანურ დანაკარგს მოუტანს, თუმცა ჩვენ ვფიქრობთ, რომ ჩვენი მომზადებისა და ჩვენი პასუხის საფუძველზე, ეს სტრატეგიულ დანაკარგს მოუტანს რუსეთსაც“, – აღნიშნა მან.