22 ნოემბერს, საუდის არაბეთის საგარეო საქმეთა სამინისტროში ხელი მოეწერა ურთიერთგაგების მემორანდუმს საქართველოსა და საუდის არაბეთის სამეფოს საგარეო საქმეთა სამინისტროებს შორის პოლიტიკური კონსულტაციების გამართვის შესახებ.
საქართველოს მხრიდან დოკუმენტს ხელი მოაწერა საუდის არაბეთის სამეფოში საქართველოს საგანგებო და სრულუფლებიანმა ელჩმა გიორგი ჯანჯღავამ, ხოლო საუდის არაბეთის მხრიდან საგარეო საქმეთა მინისტრის მოადგილემ პოლიტიკურ და ეკონომიკურ საკითხებში, ხალიდ ალ-ჯინდანმა.
ხელმოწერის შემდგომ გაიმართა საუბარი მინისტრის მოადგილესა და საქართველოს ელჩს შორის, რომლის დროსაც განხილულ იქნა ორმხრივი ურთიერთობების შემდგომი გაღრმავების პერსპექტივები. მიღწეულ იქნა შეთანხმება 2017 წელს თბილისში ორი ქვეყნის საგარეო საქმეთა სამინისტროებს შორის პოლიტიკური კონსულტაციების გამართვის თაობაზე.