„ნაციონალურმა მოძრაობამ“ გუშინ პარლამენტში თავის კუთხეში პატარა ჯოჯოხეთი მოიწყო და მის ცეცხლში თვითონვე იხრუკებოდნენ, – ამის შესახებ დევნილთა და განსახლების მინისტრობის კანდიდატმა სოზარ სუბარმა პარლამენტში განაცხადა, სადაც რიგგარეშე პლენარული სხდომა მიმდინარეობს. სოზარ სუბარმა დღევანდელი სხდომა შეაფასა, სადაც შეკითხვები მინისტრობის კანდიდატებს ძირითადად საპარლამენტო უმრავლესობის წევრები უსვამდნენ, დევნილთა და განსახლების მინისტრობის კანდიდატის შეფასებით, მე-6 მთავრობის დამტკიცებაა, რომელშიც ის მონაწილეობს და დღეს პირველადაა, როდესაც კითხვები არის საგნობრივი, შინაარსზეა საუბარი და არა რაღაც უაზრო ბრალდებები, რასაც გუშინ ჰქონდა ადგილი.
„ნაციონალური მოძრაობის“ გუშინდელმა ქცევამ მე ისეთი წარმოდგენა შემიქმნა, რომ იმუქრებოდნენ, რომ ჯოჯოხეთად ვაქცევთ პარლამენტსო, თავის კუთხეში პატარა ჯოჯოხეთი მოიწყეს და მის ცეცხლში თვითონვე იხრუკებოდნენ. დღეს ეტყობა აღარ მოეწონათ ეს როლი. მე არ მჯერა, რომ მათგან რამე კონსტრუქციულობა მოსალოდნელია, მაგრამ ყოველ შემთხვევაში დღის პირველ ნახევარში თავშეკავებულად იქცეოდნენ, რაც მისასალმებელია“, – განაცხადა სუბარმა.