ჩვენ ავირჩიეთ ევროპული ტიპის პრემიერ-მინისტრი და მინისტრთა კაბინეტი, ადამიანები, რომლებიც ახლოს არიან ხალხთან და ახლოს არიან ყოველთვის წარმატებულ შედეგებთან, – ამის შესახებ საპარლამენტო უმრავლესობის ლიდერმა არჩილ თალაკვაძემ ქუთაისში, პარლამენტში განაცხადა, სადაც პარლამენტმა ხმათა უმრავლესობით მთავრობას ნდობა გამოუცხადა.
“მე ვფიქრობ, რომ ჩვენი ქართული დემოკრატიის დემონსტრირება მოხდა დარბაზში კიდევ ერთხელ. რაც მთავარია, ჩვენ ავირჩიეთ ევროპული ტიპის პრემიერ-მინისტრი და მინისტრთა კაბინეტი. ადამიანები, რომლებიც ახლოს არიან ხალხთან და ახლოს არიან ყოველთვის წარმატებულ შედეგებთან. ჩვენ განვიხილეთ არაერთი შედეგი, რომელსაც მიაღწია ჩვენმა გუნდმა 4 წლის განმავლობაში. მათ წარმატებით შეასრულეს პირველი მისია. როგორც ყველა წარმატებული გუნდი, ახლა უფრო რთული გამოწვევის წინაშე დგანან, რა თქმა უნდა, პარლამენტი, საკანონმდებლო პროცესით მაქსიმალურად უნდა დაეხმაროს იმ გამოწვევების და მიზნების შესრულებაში. მეორე მხრივ, პარლამენტში ადგილი არის იმისთვის, რომ იყოს დებატები, იყოს შეკითხვები დ პასუხები. დღეს კიდევ ერთხელ გამოჩნდა , რომ ქართული დემოკრატია არის ბევრად უფრო წინ, ვიდრე იყო 6 წლის, 8 წლის წინ. დღეს ჩვენ ვხედავთ ახალ პოლიტიკას და ახალ პოლიტიკურ კლასს ამ დარბაზში“, – განაცხადა არჩილ თალაკვაძემ.