”სიმართლე გითხრათ,განათლების მინისტრის პოსტზე საკუთარ თავს, ოთხ წელზე მეტხანს არ განვიხილავ, თუმცა ეს არ ნიშნავს, რომ 2020 წლის შემდეგ ყველაფერზე უარს ვიტყვი და გავიქცევი. სანამ ვიგრძნობ, რომ განათლების სისტემას ვჭირდები, უკან არ დავიხევ, თუმცა გარკვეულ ეტაპზე დგება მომენტი, როცა შენგან ახალი იდეები აღარ მოდის, ასეთ დროს უნდა წახვიდე”, – განაცხადა ალექსანდრე ჯეჯელავამ “კვირის პალიტრასთან” ინტერვიუში:
“ვფიქრობ, 3-4 წელი მეყოფა რეფორმების პაკეტის სრულად ამუშავებისთვის. ნაკლებ დროში ბევრს ვერაფერს მოვასწრებ და მომიწევს, საქმეებს ბოლომდე მივყვე. პრემიერის მხარდაჭერა რომ დავკარგო, ხვალვე წავალ. რეფორმები ჩემი კი არა, პრემიერის გეგმის ნაწილია. ჩემი მოსვლა პრემიერის ფაქტორმა და მასთან მრავალწლიანმა ურთიერთობამ განაპირობა. მანამდე მსგავსი შემოთავაზება 13-ჯერ მივიღე, თუმცა უარს ვამბობდი. რაც შეეხება მინისტრთა ახალ კაბინეტს, არსებული გადაჯგუფებით კმაყოფილი ვარ. მისასალმებელია, რომ არაჩვეულებრივმა ადამიანებმა, რომლებიც ახალ მთავრობაში ვერ მოხვდნენ, პრემიერის გადაწყვეტილების შესახებ დიდი ხნით ადრე იცოდნენ და ეს სიურპრიზი არ ყოფილა. მათ იმდენი საქმე გააკეთეს, ბევრი მუშაობა დამჭირდება, მათ ღვაწლს რომ გავუტოლდე”, – განაცხადა ჯეჯელავამ.