ჟურნალისტი დარეჯან მეფარიშვილი სოციალურ ქსელში საარქივო სტატიას აქვეყნებს, რომელიც გაზეთ “ალიაში” გამოქვეყნდა.
“ალია“, 2009 წელი.
✍️ავტორი დარეჯან მეფარიშვილი
📌გიგი უგულავამ ახალი ცოლის, ლელა კილაძის დუნდულის სამკურნალოდ ბიუჯეტიდან 100 ათასი ევრო გადარიცხა გერმანიაში!
👉(სტატია შემოკლებულია)
იგი ერთი უბრალო თბილისელი ბიჭი იყო, რომელსაც კარგად ცხოვრება უყვარდა, მაგრამ საშუალება არ ჰქონდა, ამიტომ ცხოვრებას ფილოსოფიურად უყურებდა, თუმცა დიდი ფილოსოფიური გაქანებით არ გამოირჩეოდა. ფიქრობდა ჯერ სულზე და ამიტომ ორი წელი სასულიერო სემინარიაში ისწავლა, მაგრამ მიხვდა, ასკეტიზმი მისი ცხოვრების წესი რომ ვერ იქნებოდა და ისევ ფილოსოფიას დაუბრუნდა, თუმცა არც რელიგიის ისტორიის მასწავლებლობამ მოჰგვარა შვება. მიწიერი სიამტკბილობა ეწადა და საარბრიუკენს მიაშურა, იწვალა, იმუშავა და მაინც ვერაფერს გახდა. გერმანიაში კიდევ მეტად დარწმუნდა, რომ კარგად ცხოვრება სასიამოვნოა, მაგრამ ადვილად მიღწევადი არ არის. მას სახელიც უნდოდა, ფულიც, დიდებაც…
«იბერია-ტვ»-ში მუშაობამ სახელი მოუტანა. მართალია, ცნობილი ჟურნალისტი, ლუბა ელიაშვილი, ვერ დაარწმუნა საკუთარ განსაკუთრებულობასა და ნიჭიერებაში, მაგრამ გიგილოს გული მაინც არ გაუტეხავს და გადაეშვა «ენჯეოშნიკურ» ორომტრიალში.
«ალპეში» მისი დირექტორობის დროს პირველად გამოსცადა, რომ რეფორმატორობის და რეფორმების სახელით ბევრი ფულის კეთება იყო შესაძლებელი, თუმცა გავიმეორებ, _ მას სახელიც უნდოდა, დიდებაც… სოროსის ფონდში განათლების სექტორის ჯგუფის კოორდინატორობა ამას ვერ მოუტანდა, მაგრამ ის თავის «ოქროს საათს» ელოდა და ეს საათიც დადგა. «ვარდების რევოლუციამ» მისი ოცნებების ასრულებას ხორცი შეასხა.
ამ თბილისელ ბიჭს, როგორც, ალბათ, უკვე მიხვდით, გიგი უგულავა ჰქვია, რომელსაც ხალხმა «იგულავა» შეარქვა…
პირველად გიგი უგულავას ფუფუნებისადმი სიყვარული მაშინ გამოაშკარავდა, როცა საქართველოს ფეხბურთის ნაკრების მოთამაშის, რატი ალექსიძისთვის ვარდოსნებისგან ჩამორთმეული მანქანა, ლურჯი «ბმვ იქს-5», სახელმწიფო ნომრით «მსს 045» ქალაქში შენიშნეს (საჭესთან გიგი იჯდა, ჯერ კიდევ, უშიშროების მინისტრის მოადგილე), არადა, ეს მანქანა პროკურატურის ავტოსადგომზე უნდა მდგარიყო.
იმ პერიოდის გენერალური პროკურორის, ირაკლი ოქრუაშვილის ნებართვის გარეშე მანქანის სადგომიდან გამოყვანას ვერავინ გაბედავდა. მაშინ მანქანას გიგის მძღოლი, კობა სუბელიანი მართავდა და კობამაც საკუთარ თავზე აიღო ყველაფერი, სამაგიეროდ, გიგიმ კობა დაიცვა და კობამაც დაუფასა, მაგრამ გიგიმ არ დაიცვა მისი მეორე მეგობარი, ირაკლი ლორთქიფანიძე, ბათუმის ყოფილი მერი და ახლა საქართველოს ელჩი საბერძნეთში.
ირაკლის ასარჩევად სამი თვე იმუშავეს გიგიმ, გივიმ, გიგამ. თავად მიშა ჩავიდა ბათუმში და ბათუმელებს გამოუცხადა, რომ თუ ამ ბიჭს არ აირჩევთ, ბათუმში არც გზები გაკეთდება და არც კანალიზაციაო.
ჰოდა, აირჩიეს ბათუმელებმა ირაკლი. ის გამოუცდელი კადრი კი იყო, მაგრამ წესიერი კაცის სახელი ჰქონდა. ეს არცაა გასაკვირი, ამ ხელისუფლების სტილია _ ფასადი და უკანახედი. ფასადი იყო ბუნჩულა ლორთქიფანიძე. მან ერთი სამსახურის (ამ სამსახურის უფროსი ვარშალომიძის ახლო მეგობარი გახლდათ) გარდა, ყველა სამსახურის უფროსი შეცვალა და გიგის ბიჭები დაასაქმა…
აქ დაუშვა გიგიმ პირველი შეცდომა, ვერ გათვალა მისი და ვარშალომიძის წონა. მთელ ბათუმს ახსოვს ხმაურიანი სპეცოპერაცია ბათუმის მერიაში 2007 წლის გაზაფხულის ბოლოს. მაშინ დააკავეს ყველა სამსახურის უფროსი, მთავარი არქიტექტორის ჩათვლით. გიგიმ ეს ამბავი არ შეიმჩნია. ლორთქიფანიძე არ დააკავეს მხოლოდ იმიტომ, რომ მიშა შეშფოთდა, თვითონ აპიარებდა ცოტა ხნის წინათ და ახლა ციხეში უნდა გაეშვა? გიგიმ დაიკიდა მეგობარი, მიშამ კი ის საბერძნეთში გაუშვა ელჩად.
როგორც ამბობენ, უგულავამ ბიუჯეტის ხარჯზე ხელის მოთბობას ჯერ კიდევ სამეგრელო-ზემო სვანეთის გუბერნატორობის დროს აუღო ალღო. მის სახელს უკავშირდება დადიანების სასახლის, ზუგდიდის ბაზრის სკანდალი; მაგრამ ყველაზე კარგად გიგიმ დედაქალაქის მერობისას გაიჯეჯილა. არც იმაზე უფიქრია, ახალი მეთოდები მოეფიქრებინა. «ყველაფერი ახალი, კარგად დავიწყებული ძველია», _ ზოდელავა თუ «ასფალტჩიკი» იყო, გიგი გზების მშენებელია. ყველას გვახსოვს, «ჩვენ გადავთხარეთ 100 ქუჩა» და იქვე მიწიდან ამომხტარი, რატომღაც, შავთმიანი გიგი ბილბორდზე _ თბილისის მერია ბოდიშს გიხდით…
გახსოვთ, გრანიტის ტროტუარები ბაზალტის ქვით რომ ჩაანაცვლეს? მოგეხსენებათ, გრანიტი საუკუნეები ძლებს და მთელი ევროპა საუკუნოვანი გრანიტითაა მოპირკეთებული. რატომ გახდა მისი შეცვლა აუცილებელი? იმიტომ, რომ გრანიტი 20-ჯერ უფრო ძვირია და ის გაყიდეს.
📌(ეს ერთი აბზაცი ჩავამატე ახლა. ამ საკითხზე “ალიაში” სტატია იყო გამოქვეყნებული, ჩემი ავტორობით) სხვათაშორის, ამ მეთოდით ცოტა უფრო ადრე, სააკაშვილის იუსტიციის მინისტრობის დროს, თავად „მიხეილ დიდმა“ ისარგებლა, ციხეებში დაშალა საწარმოები და ჯართად, კაპიკებში გაყიდა მილიონის ქონება… ამ საქმეზე გამოძიებაც ჩატარდა, მაგრამ შევარდნაძემ მიშა “დაკრიშა” – რეფორმატორს პასუხი რომ მოვთხოვო, ამერიკა და დანარჩენი მსოფლიო რას იტყვისო. ასე გადაურჩა პირველად მიშა პატიმრობას. გამოძიების მასალები ისევ ჩემთან ინახება 🙂
იცით, რა დაჯდა აპოლონ ქუთათელაძის ქუჩაზე ეზო? 120 ათასი ლარი და რამდენია გამოყოფილი წელიწადში მაწანწალა ძაღლებთან ბრძოლისთვის? _ 2,5 მილიონი. ძაღლები უნდა დაიჭირონ და დააძინონ.
მთავარი ტვინი, ანუ დამგეგმავი არის ახვლედიანი, შემსრულებელი იყო კობა სუბელიანი. «აქსისი» დეველოპერული კომპანია – ყველა სასურველი, საუკეთესო ადგილი შეღავათებით აქვს აღებული იმიტომ, რომ გიგი უგულავა ლობირებს. «მაგი სტილი» დეველოპერული სამშენებლო კომპანიაა, რომელიც ფინანსდება საბიუჯეტო თანხით. თავდაცვის სამინისტროს შეკვეთები, პრეზიდენტის საარჩევნო კამპანიების კეთილმოწყობა, «რუსთავი 2» გადაცემული აქვთ მართვაში. რაც კეზერაშვილი წამოვიდა თავდაცვის მინისტრობიდან, «რუსთავი 2»-ის 100%-იანი დამფუძნებელი არის «მაგი სტილი» და გენერალურ დირექტორად დაინიშნა „მაგი სტილის» მოწილე, ირაკლი ჩიქოვანი.
ირაკლი ჩიქოვანის კომუნიკაციების მარეგულირებელ კომისიაში გადაყვანის შემდეგ «რუსთავი 2»-ის გენერალურ დირექტორად დაინიშნა «მაგი სტილის» დამფუძნებელი, გოგი გეგეშიძე. ამავე დროს «რუსთავი 2»-ში ინტერესები აქვთ: გიგი უგულავას, გიორგი არველაძეს და გიგა ბოკერიას, ამიტომ ეს პირები ლობირებენ კომპანიას «მაგი სტილი» და ფინანსურად ხელსაყრელ ტენდერებს აგებინებენ (ზოგჯერ ტენდერების გარეშე).
ხალხმა არ იცის, რომ უგულავას ფინანსური ინტერესები დევს მოსკოვის პროსპექტზე, ეგრეთ წოდებულ მერვე პოლკის ტერიტორიაზე, სადაც პერმანენტულად ინგრევა «ხრუშჩოვკის» ტიპის სახლები და შენდება 16-სართულიანი კორპუსები, რაც გიგი უგულავას უშუალო ბიზნესია. ეს ადამიანი სრულად დაეუფლა დედაქალაქის ისტორიულ უბნებს: ეს არის მეიდანი, აბანოთუბანი, თაბორის მთა, სადაც ლანდშაფტის დარღვევით მიმდინარეობს მშენებლობა.
ერთ-ერთი სკანდალური წერტილია კინოთეატრ «ამირანის» წინ, სადაც შენდება ბიზნესცენტრი. ამ მშენებლობის გვერდითაა ისტორიული სახლი, რომელსაც სპეციალურად გამოუნგრიეს საძირკველი, რასაც ჰქონდა ერთადეთი მიზანი, ჩამოშლილიყო სახლი და შემდეგ მის მფლობელებს იაფად მიეყიდათ გიგი უგულავას სატელიტი ფირმისთვის «გრატო-პასაჟისთვის». ეს ფირმა შეფუთეს და გამოაცხადეს, რომ დააფუძნა ვიღაც უცხოელმა მონარქმა, რომ არის ყველაზე ძლიერი ფირმა და ასე შემდეგ. თან, ისე ააშენეს 5 სართული, მშენებლობის ნებართვაც კი არ ჰქონდათ. ხალხმა პროტესტის ნიშნად სახლზე გადმოფინა პლაკატი _ უგულავა ანგრევს…
სახლი რომ ჩამოიშალა და ავარიული გახდა, მერიამ პასუხისმგებლობა აიცილა სარემონტო ხარჯებისთვის და როცა პლაკატი გამოფინა ხალხმა, გიგი უგულავამ შუაღამისას ბანდიტურად მიუსია ქალაქის საგანგებო სიტუაციების სამსახურის თანამშრომლები, რომლებიც თოკებით ჩავიდნენ მაღლა სართულებიდან, შეუვარდნენ ამ ხალხს სახლებში და ასე ჩამოჭრეს პლაკატი…
ვაკის სახანძრო სამსახური სადაც იყო ადრე, ახლა შენდება «პიქსელ-ცენტრი», ადრე შუშის შენობა იდგა მიწისქვეშა გადასასვლელთან. ამ შენობის დანგრევის მოტივაცია იყო ის, რომ ამახინჯებდა იერსახეს. იმ ადგილას გიგი უგულავამ ააშენა «პიქსელ-ცენტრი», სადაც ერთი კვადრატული ღირს 5500 ევრო…
ყველაზე დიდი საშინელება, რაც მოხდა, არის «რუსთავი 2»-ის შენობის ჩამონგრევის ფაქტი. ამ შენობას აშენებდა ფირმა «არტ-იქსი». კომპანიას აკონტროლებს გიგი უგულავა. აქ, აგრეთვე, არიან დავით კეზერაშვილის და გიგა ბოკერიას მეუღლეები. როცა ფაქტი მოხდა და ჩამოინგრა შენობა, სააკაშვილმა ნიანგის ცრემლების ღვრით განაცხადა, _ 10 დღეში დასკვნა იქნება, რატომ დაინგრა შენობაო. ათი დღეც გავიდა და მეტიც, მაგრამ არავინ სცემს კითხვას პასუხს, _ რატომ დაინგრა შენობა და რატომ დაიღუპა იქ 2 ახალგაზრდა? ვინ იყო დამნაშავე? გიგი უგულავას პოზიცია გახსოვთ, ალბათ, როგორ გადაეფარა «არტ-იქსს» და თქვა ტყუილი, თითქოს, ფირმა კი არ აშენებდა, არემონტებდა და ისინი არაფერ შუაში არიანო. არადა, ყველამ იცის, რომ ამ ფირმის არაპროფესიონალიზმის და ფულის სწრაფად კეთების ჟინის გამო დაიღუპნენ იქ ახალგაზრდები. ეს ფირმა აშენებდა იქ დარბაზებს და რაღაც ახალ ფანტაზიებს იგონებდნენ, გამოუღეს საძირკველი შენობას და დადგა კიდეც სავალალო შედეგი, თუმცა არავინ სთხოვს მათ პასუხს და არც მოსთხოვენ. სამშენებლო ბიზნესში კონკურენცია არ არსებობს, აქ არის ერთადერთი კონკურენცია _ ვის დაადებს გიგი უგულავა თათს და «დაკრიშავს»…
თუ ვანო გაკოტრებულ კომპანიებს იაფად ყიდულობდა, «კეზერა» აშინებდა, გიგი ბიუჯეტს დააჯდა. თუ ვანოსა და კეზერას ხალხის სიყვარულზე პრეტენზია არ განუცხადებიათ, გიგის საპრეზიდენტო ამბიციები არ დაუმალავს. მოკლედ, ფულიც აკეთო და თან ხალხს უყვარდე, არ არის მარტივი საქმე. მხოლოდ გაბუტული ტუჩები, ბავშვებთან გადაღებული ფოტოები და მოხუცი პენსიონერისთვის მიტანილი ტელევიზორი «რუსთავი 2»-ის კამერების წინ, ხალხის სიყვარულს არ მოგიტანს. არც თავისიანებმა აპატიეს მას ეს სურვილი. როგორც კულუარულად ამბობენ, გიგისა და მერაბიშვილ-ადეიშვილს ურთიერთობები ძალიან დაეძაბათ აგვისტოს ომის შემდეგ. რომ არა ოპოზიციის საპროტესტო გამოსვლების მოლოდინი, უგულავა 2009 წლის დადგომას საკანში შეხვდებოდაო, ამასაც ამბობენ.
აგვისტოს ომის შემდეგ რესტორან «ვენეციაში» ვანო მერაბიშვილმა და ერეკლე კოდუამ ჟურნალისტები დაპატიჟეს, მხოლოდ ისინი, ვინც «დაიმსახურეს»…
რა თქმა უნდა, სუფრაზე ბედკრული და მრავალტანჯული საქართველოს ბედზე მსჯელობდნენ და ვარამს ღვინოში ახრჩობდნენ. ჩვენ იქ არ ვყოფილვართ, მაგრამ ინფორმაცია უტყუარია _ ვანო და ერეკლე ღიად ოხუნჯობდნენ გიგილოზე, _ ეს რამსიგრძე ფეხები ჰქონიაო, როგორი სირბილი სცოდნიაო, როცა გორის დაბობმვის შემდეგ პრესცენტრი დახურა და გამოიქცაო, ისეთი «რაზგონი» აიღო, წითელ ხიდთან ძლივს დავამუხრუჭებინეთო. _ რა ეგონა, «კარბელა» ვერ გახსნიდა ამ ცენტრსო? _ აი, ასე არ დაუფასეს გიგის ლოჯისტიკის მართვა აგვისტოს ომის დროს.
საერთოდ, გიგის ჩვევად ექცა, ურთიერთობების იგნორირება, მისი ცოლისძმის მეგობარი საკუთარ კაბინეტში დააჭერინა. შარშან შემოდგომაზე ძველი თბილისის გამგეობის თანამშრომლებიც არ მოუკითხავს, ჩვენც ვწერდით ამაზე, მაშინ მერიისა და გამგეობის ოთახებში პროკურატურამ «ჟუჩოკები» დააეყენა, გიგიზე უნდოდათ გასვლა.
7 მაისს დილას მოხუცი ქალი, მერიის თანამშრომელი, მერიის შენობაში გამოხატავდა პროტესტს. დერეფანში მაღალჩინოსნებმა წვრილად გამოიკითხეს და რომ შეიტყვეს ამბავი, დედა აგინეს და განცხადების დაწერა მოსთხოვეს, მაგრამ სად სცალია, ახლა, გიგის მოხუცებზე ფიქრისთვის, როცა მისი ახალი ცოლის დუნდულის კუნთია სასწრაფოდ საშველი _ ლელა კილაძეს დუნდულის კუნთის სამკურნალოდ 100 ათასი ევრო გადაირიცხა გერმანიაში, ეს ფული კი დედაქალაქის მერიამ გადარიცხა.
სარემონტო სამუშაოების შეჩერება რა სახსენებელია, როცა დედაქალაქის პირველ ლედის ეხება საქმე. ახლა მთავარია, ლელა იყოს კმაყოფილი, თუ ის იქნება კმაყოფილი, გიგიც კმაყოფილი იქნება და თუ გიგი კმაყოფილი იქნება, იქნებ, ნაგავიც გაიტანოს და ბიოტუალეტებიც დადგას. მაგრამ, მანამდე, მერიის ბოლო სართულზე საუნა და სოლარიუმი გახსნა და ლელა კილაძის „პადრუგა» დანიშნა მენეჯერად,
ეს „პადრუგა», ცოტა ხნის წინათ, ქმარს გაშორდა და დეპრესია ჰქონდა, ლელაკომ და გიგილომ საზღვარგარეთ გაუშვეს…
და ბოლოს, ატენის #18-ში უგულავამ თავის ყოფილ ცოლს 250 000-დოლარიანი ბინა უყიდა.”