სალომე ზურაბიშვილი თუ არჩევანს გააკეთებს სიმშვიდესა და არეულობას შორის არეულობაზე, ეს ნაბიჯი უნდა შეაფასოს საზოგადოებამ, – ამის შესახებ პარტია „ქართული ოცნების“ თავმჯდომარემ ირაკლი კობახიძემ განაცხადა.
„შეწყალება არა ჩვენი, არამედ პრეზიდენტის პრეროგატივაა. კიდევე ერთხელ შეგვიძლია გავიმეოროთ ის, რომ ერთადერთი, რაც ამ ადამიანებს ამოძრავებთ, არის ქვეყანაში არეულობის შექმნის ინტერესი. იცის, რომ სწორედ ამ მიზნით ჩამოიყვანეს სააკაშვილი საქართველოში და ამავე მიზნით სურთ მისი გათავისუფლება. ეს ინტერესი საზოგადოებამ უნდა ამოიკითხოს და ამის მიხედვით გააკეთოს დასკვნები. თუ სალომე ზურაბიშვილი სიმშვიდესა და არეულობას შორის არჩევანს გააკეთებს არეულობაზე, ეს ნაბიჯიც უნდა შეაფასოს საზოგადოებამ. იმედი მაქვს, რომ პრეზიდენტი ამას არ გააკეთებს. როდესაც კონკრეტული ადამიანები ნერვიულობენ მიხეილ სააკაშვილის ჯანმრთელობის შესახებ, ეს ის ადამიანები არიან, რომლებმაც ჩამოიყვანეს სააკაშვილი საქართველოში ქვეყნის ასარევად და პირდაპირ მოუწოდებდნენ სააკაშვილს თვითდაზიანებისკენ. ეს ყველაფერი აჩვენებს იმას, რომ ეს არის ცარიელი სპეკულაცია და მათ არაფერი ადარდებთ, გარდა იმისა, რომ უნდათ ქვეყანაში მდგომარეობის არევა სააკაშვილის გათავისუფლებით“,- აღნიშნა ირაკლი კობახიძემ.