დიპლომატიის ისტორიაში არ არსებობს არცერთი დიპლომატი, რომ სტუმარმა დიპლომატმა ასეთი განცხადება გააკეთოს ქვეყნების ურთიერთობების საწინააღმდეგოდ, ამას ჰქვია ცეცხლზე ნავთის დასხმა, – ამის შესახებ პარლამენტის ვიცე-სპიკერმა გიორგი ვოლსკიმ გადაცემა „იმედი LIVE“-ში განაცხადა, რითაც გამოეხმაურა უკრაინის საქმეთა დროებითი რწმუნებულის, ანდრეი კასიანოვის განცხადებას.
„რა ქნას კასიანოვმა?! გამორიცხულია, რომ ეს პირადი მოსაზრება იყოს. ის რამდენიმე მიღებაზე შემხვდა და ისეთი სიხარული გამოხატა, ვფიქრობ, რომ ისიც არაადეკვატურია ან სტრესის ქვეშ იმყოფება შექმნილი ვითარების გამო.
კასიანოვი საკუთარ საჭიროებას ამტკიცებს და რომის პაპზე მეტი კათოლიკე უნდა გამოჩნდეს. ეს დასაშვებია გამომდინარე მისი პიროვნებიდან. ის არა მარტო არაადეკვატურ განცხადებებს აკეთებს, არამედ არაადეკვატურია თავის მოქმედებებში, ღიმილსა და ქცევაში. იგი მიდის იმ ინსტრუქციების შესაბამისად, რომელსაც იღებს, ან ერთხელ მიიღო და მუდმივად ასრულებს“, – აღნიშნა გიორგი ვოლსკიმ.
საქართველოში უკრაინის დროებითი რწმუნებული ანდრეი კასიანოვი საქართველოდან უკრაინის მოქალაქეების ევაკუაციის შესაძლებლობას არ გამორიცხავს, თუ მათ საქართველოსა და რუსეთს შორის პირდაპირი ფრენების აღდგენისა და „რუსების მასობრივად შემოდინების“ შემთხვევაში, საფრთხე დაემუქრებათ.