219 ხმიდან 175 მიიღო ტინი კოქსმა. როგორ წარმოგიდგენიათ, ყველას დაურეკა რუსეთმა და უთხრა, რომ ტინი კოქსისთვის დაეჭირათ მხარი? ეს ხომ უბრალოდ სისულელეა, – ამის შესახებ პარტია „მოქალაქეების“ ერთ-ერთმა ლიდერმა ლევან იოსელიანმა განაცხადა.
მისი თქმით, „ნაციონალური მოძრაობა“ ცდილობს ყველა შესაძლებლობა გამოიყენოს საკუთარი პარტიული ინტერესისთვის და ხანდახან ეს ძალიან კომიკურ ფორმას იღებს ხოლმე.
„219 ხმიდან 175 მიიღო ტინი კოქსმა. მას მხარი დაუჭირა დასავლეთ ევროპის ფაქტობრივად ყველა ქვეყანამ, ბრიტანეთმა და როგორ წარმოგიდგენიათ, ყველას დაურეკა რუსეთმა და უთხრა, რომ ტინი კოქსისთვის დაეჭირათ მხარი? ეს ხომ უბრალოდ სისულელეა. ცდილობენ ყველა შესაძლებლობა გამოიყენონ საკუთარი პარტიული რაღაც ინტერესისთვის. ხანდახან ეს ძალიან კომიკურ ფორმას იღებს ხოლმე. ეს ის შემთხვევაა, რომელმაც კომიკური ხასიათი მიიღო“, – აღნიშნა ლევან იოსელიანმა.
ევროსაბჭოს საპარლამენტო ასამბლეის ახლად არჩეული პრეზიდენტი ქართულ პოლიტიკურ სპექტრში დაპირისპირების მიზეზი გახდა. ოპოზიციის ნაწილი ტინი კოქსს პრორუსს უწოდებს და „ქართულ ოცნებას“ მისი მხარდაჭერის გამო აკრიტიკებს.
ტინი კოქსი, ჯამში, 175-მა დეპუტატმა აირჩია, მეორე კანდიდატს, უკრაინელ ალექსანდრ მერეჟკოს კი მხოლოდ 44 -მა წარმომადგენელმა დაუჭირა მხარი.