გულაგების შემქმნელი პარტია რომ საუბრობს ან დემოკრატიაზე, ან უფლებებზე, ან 9 აპრილთან ცდილობს, თავისი თავი გააიგივოს, ამით აჩვენებენ, რომ ყველაფრის გაუფასურება შეუძლიათ საკუთარი ყოფნით შორიახლოს, – ამის შესახებ პარლამენტის თავმჯდომარემ, შალვა პაპუაშვილმა ”ნაციონალურ მოძრაობაზე” საუბრისას განაცხადა.
მისი თქმით, „ნაციონალური მოძრაობის“ პოლიტიკური ფილოსოფია არის ადამიანების ჩაგვრა.
„ნაციონალური მოძრაობა“ არის პარტია, რომელმაც ხელისუფლებაში ყოფნის დროს შექმნა გულაგების სისტემა. სისტემა, სადაც ადამიანები ციხეში მოხვედრის შიშით ან გზით იჩაგრებოდნენ, ითრგუნებოდნენ, ღირსების აყრა ხდებოდა და ძალადობა იყო ყოველდღიური საქმე მაშინდელი ხელისუფლების. დღესაც ზუსტად ის ფაშისტური კამპანია რაც აქვთ აწეული ადამიანების, მათი ოჯახის წევრების მიმართ, როცა მიდის მუქარა და ფსიქოლოგიური ძალადობა, ეს აჩვენებს, რომ ამ ადამიანებმა საერთოდ ვერაფერი გააცნობიერეს. ისეთივე მოძალადეები არიან, როგორებიც იყვნენ ხელისუფლებაში. ერთადერთი განსხვავებაა, რომ მათ არ აქვთ ძალაუფლების ბერკეტები და თავის ძალადობრივ იდეებს ვერ ახორციელებენ. როგორც კი მიიღებენ ერთ გრამ ხელისუფლებასაც კი, იმ მომენტშივე გამოაჩენენ თავის ბრჭყალებს და ზუსტად იმ გულაგების სისტემას აღადგენენ, რომელიც მათ ჰქონდათ საქართველოში დამკვიდრებული.. რაც შეეხება აქციების დაანონსებას, ეს პოლიტიკური ფარისევლობაა. გულაგების შემქმნელი პარტია რომ საუბრობს ან დემოკრატიაზე, ან უფლებებზე, ან 9 აპრილთან ცდილობს, თავისი თავი გააიგივოს, ამით აჩვენებენ, რომ ყველაფრის გაუფასურება შეუძლიათ საკუთარი ყოფნით შორიახლოს. რეაქცია მარტივია. საზოგადოებამ უკვე ბევრჯერ დაანახა „ნაციონალურ მოძრაობას“, რომ მათი რადიკალური ქმედებები არ იქნება მიღებული“, – განაცხადა პაპუაშვილმა.
ამასთან, პარლამენტის თავმჯდომარის თქმით, ყოფილი ხელისუფლების უცხოეთში მყოფი წარმომადგენლები, რომელთაც საქართველოში საქმეა აღძრული და სასჯელი აქვთ მოსახდელი, ქვეყანას უნდა გადმოსცენ.
„პრობლემა არის შემდეგში, 2018 წლიდან ჰქონდა სააკაშვილს მისჯილი, თუმცა თავისუფლად გადაადგილდებოდა ევროპაში და იყო ჩართული ქართულ პოლიტიკაში უკრაინის მოქალაქე. მას სხვადასხვა დედაქალაქებში ეპატიჟებოდნენ, ხვდებოდნენ, ჩვენ ვაფრთხილებდით, მათ შორის ჩვენს ევროპელ კოლეგებს, რომ ის რადიკალიზმი, რაც საქართველოში იყო, მიხეილ სააკაშვილის მხრიდან იყო ორკესტრირებული და ის, რომ მისი გადმოცემა არ ხდება საქართველოსთვის, ადამიანის, რომელმაც მკვლელებს ხელი დააფარა და ადამიანი აცემინა , ეს ახალისებდა ჩვენთან რადიკალიზაციას. დღესაც იგივე სიტუაცია გვაქვს სამწუხაროდ. დავით კეზერაშვილი, ზურაბ ადეიშვილი, სხვები, რომლებზეც საქართველოში არის საქმე აღძრული, თავისუფლად გადაადგილდებიან ამა თუ იმ ქვეყანაში და იქიდან მართავენ რადიკალურ პროცესებს. ამიტომ, ვფიქრობ, ყველამ დასკვნები უნდა გამოიტანოს წარსულიდან, ყველამ ვინც თვლის საქართველოს მეგობრად თავს. ამ ადამიანებს კი არ უნდა მისცეს პლატფორმა და პიედესტალი, რომ საზღვარგარეთიდან აქ არიონ სიტუაცია, არამედ მართლმსაჯულებას გადასცენ ეს ადამიანები. ამ ადამიანების საქართველოსთვის გადაცემა არის მნიშვნელოვანი. მათი შეფარება არის საქართველოს მიმართ არამეგობრული საქციელი“, – განაცხადა პაპუაშვილმა.