საქართველოს პრეზიდენტი სტამბოლში მსოფლიო ჰუმანიტარული სამიტის ფარგლებში კოტ დივუარის პრემიერმინისტრ დანიელ კაბლან დუნკანს შეხვდა.
მხარეებმა ქვეყნებს შორის არსებული ორმხრივი ურთიერთობები განიხილეს და თანამშრომლობის დღის წესრიგის გაფართოებასთან დაკავშირებით მზადყოფნა გამოთქვეს.
შეხვედრისას მხარეებმა მსოფლიოში არსებულ ტერორიზმის საფრთხეებზეც გაამახვილეს ყურადღება.
„ამავდროულად, დღეს საქართველოს პრეზიდენტი გამართავს შეხვედრას თურქეთის პრეზიდენტთან, ბატონ ერდოღანთან და ასევე, სამიტის ფარგლებში დაგეგმილია რამდენიმე ორმხრივი შეხვედრა, მათ შორის, ეს გაეროს გენერალური ასამბლეის პრეზიდენტთან.
დღეს და ხვალ სამიტის ფარგლებში პრეზიდენტი მიიღებს მონაწილეობას მრგვალი მაგიდის ფორმატში გასამართ შეხვედრებზე, საკითხები შეეხება კონფლიქტებს, კონფლიქტების პრევენციას და იძულებით გადაადგილებულ პირთა პრობლემებს“, – განაცხადა პრეზიდენტის ადმინისტრაციის უფროსმა გიორგი აბაშიშვილმა.