ევროინტეგრაციის მიმართულებით ჩვენს ხელისუფლებაზე მეტი არავის გაუკეთებია ბოლო 30 წლის განმავლობაში. არაფერს საფრთხე არ შეექმნება, – ამის შესახებ საქართველოს პრემიერ-მინისტრმა, ირაკლი ღარიბაშვილმა განაცხადა.
მისივე თქმით, ხელისუფლება ყველა ნაბიჯს სწორად დგამს.
„ვფიქრობ, არასწორად აკავშირებთ ჩვენი ქვეყნის ევროპულ მომავალთან გადაწყვეტილებას, რომელიც უკავშირდება ვაჭრობის გააქტიურებას, მიმოსვლას. ეს არასწორი ინტერპრეტაცია, არასწორი დაკავშირებაა. ჩვენ არაერთხელ გვითქვამს, რომ რუსეთთან ვაჭრობას, ეკონომიკას არ ვაჩერებთ, რადგან ეს ჩვენი ხალხის ინტერესებს დააზიანებს. მეორე მიმართულება არის ჩვენი ქვეყნის ევროინტეგრაცია, რაშიც ჩვენს ხელისუფლებაზე მეტი არავის გაუკეთებია ბოლო 30 წლის განმავლობაში. ვინმემ რაიმე შედეგი თუ მოიტანა, ეს მოიტანა „ქართულმა ოცნებამ“. ასოცირება, უვიზო რეჟიმი, 100 ევროდ გადაადგილდებით თავისუფლად ევროპაში – ეს ჩვენი დამსახურებაა, ბიძინა ივანიშვილისა და მისი გუნდის, „ქართული ოცნების“ დამსახურებაა. არაფერს საფრთხე არ შეექმნება. ყველაფერს ვაკეთებთ სწორად, ყველა ნაბიჯს ვდგამთ სწორად, ვუხსნით ჩვენს ევროპელ მეგობრებს. პირადად მქონდა საუბარი და ავუხსენი ჩვენი არგუმენტაცია, მოტივაცია. ჩვენ არ ვართ ევროკავშირის წევრი ქვეყანა. ჩვენ რომ დავემორჩილოთ ევროკავშირის წევრი ქვეყნებისა და ევროკავშირის პოლიტიკას, ჩვენ უნდა ვიყოთ ევროკავშირის წევრი ქვეყანა. დღეს, ჯერჯერობით ევროკავშირის წევრი ქვეყანა არ ვართ. ამას დასჭირდება წლები. ამისთვის თუ ვინმემ რაიმე გააკეთა ბოლო 30 წელიწადში, გააკეთა „ქართულმა ოცნებამ“ – ასოცირება, თავისუფალი ვაჭრობა, უვიზო რეჟიმი, ევროპული პერსპექტივა, რომელზეც ვერ იოცნებებდა თქვენი პარტიის ვერც ერთი წარმომადგენელი. ევროპული პერსპექტივით რეალურად ჩვენმა ევროპელმა პარტნიორებმა აღიარეს, რომ ჩვენი ქვეყნის მომავალი არის ევროპაში. ამაზე უნდა გააკეთოთ აქცენტი“, – განუცხადა ირაკლი ღარიბაშვილმა ჟურნალისტებს.