კიდევ ერთხელ დარჩნენ გაწბილებულნი ჩვენი ოპონენტები, რადგანაც ხშირად გვესმოდა მათი მხრიდან შეფასებები, საფუძველს მოკლებული ბრალდებები და ეს კეთდებოდა მათი ვიწროპოლიტიკური დღის წესრიგიდან გამომდინარე და ამით ისინი აზიანებდნენ ჩვენი ქვეყნის რეპუტაციას, – ამის შესახებ ილია დარჩიაშვილმა საქართველოში საერთაშორისო სანქციებზე მომუშავე ჯგუფის ვიზიტზე საუბრისას განაცხადა. ვიცე-პრემიერი, საგარეო საქმეთა მინისტრი ვიზიტის მნიშვნელობას უსვამს ხაზს.
„ამ ფორმატში პარტნიორების ვიზიტი ძალიან მნიშვნელოვანია. მათ მიეცათ შესაძლებლობა საქართველოში ენახათ ის გადადგმული ნაბიჯები, ის უზარმაზარი ძალისხმევა, რომელიც ჩვენმა ხელისუფლებამ გასწია და სწევს ამ ძალიან რთულ ვითარებაში. ზოგადად, ჩვენ ვართ პასუხისმგებლობიანი ქვეყანა, პასუხისმგებლობიანი მთავრობა. თავის დროზე ავიღეთ პასუხისმგებლობა, საჯაროდ გამოვაცხადეთ, რომ საქართველო მყარად დაიცავს ფინანსურ სანქციებთან დაკავშირებულ საკითხებს. ეს კიდევ ერთხელ დადასტურდა და ჩვენმა პარტნიორებმა საკუთარი თვალით ნახეთ ის, რაზეც ჩვენ ყოველდღიურად ვსაუბრობთ. საქართველო გააგრძელებს აქტიურ მუშაობას ამ მიმართულებით, ძალიან მჭიდრო კოორდინაციას ჩვენს პარტნიორებთან“, – განაცხადა დარჩიაშვილმა.
საერთაშორისო სანქციებზე მომუშავე ჯგუფი საქართველოს ხელისუფლებას მადლობას უხდის. ჯგუფის წევრები აღნიშნავენ, რომ ქვეყანამ მასშტაბური კომპლექსური სისტემა შეიმუშავა იმისთვის, რათა სანქციებისთვის გვერდის ავლა ვერ მოხერხდეს. დღევანდელ ბრიფინგზე ისიც ითქვა, რომ სანქციები ეხება ისეთ ფინანსურ სექტორს, ნივთებსა და საქონელს, რომელიც შეიძლება, გამოყენებული იყოს იარაღის შესაძენად ან ბრძოლის ველზე. ეს კი იმას ნიშნავს, რომ არავინ ითხოვს საქართველოსგან ვაჭრობის შეჩერებას საკვებზე, სასუქზე ან სხვა ფართო მოხმარების საქონელზე.