საპარლამენტო უმცირესობის ერთ-ერთი ლიდერი მიხეილ მაჭავარიანი არ გამორიცხავს, რომ პარტია „ნაციონალური მოძრაობიდან“ შესაძლოა, ვინმეს „ნერვებმა კიდევ უმტყუნოს“ და პარტიიდან წავიდეს. განცხადება მაჭავარიანმა „ახალ თაობასთან“ ინტერვიუში გააკეთა:
„ვიღაცას, შესაძლოა, კიდევ უმტყუნოს ნერვებმა და წავიდეს. მე ეს არ მიმაჩნია დიდ ტრაგედიად. საარჩევნო სიის ფორმირების დროს ყოველთვის არის დაძაბულობა. ასეთი რამე ყველა პარტიაში ხდება. მე არ ვმალავ, რომ ჩვენთან დაძაბულობა არის, მაგრამ თქვენ უნდა ნახოთ, ქოცებში რა ხდება. პარლამენტში რასაც ვხედავ, ესეც საკმარისია დასკვნის გასაკეთებლად.
სიაში სასურველ ადგილზე არმოხვედრის გამო პარტიიდან დემარშით წასვლა გამართლებული ნაბიჯი არ არის. ასეთ რამეს უპასუხისმგებლო ადამიანები აკეთებენ. გიორგი ვაშაძეს შეუძლია, ყველაფერი დამაბრალოს, მაგრამ მე უამრავი ადამიანის წინაშე მაქვს პასუხისმგებლობა აღებული. საუბარია ჩვენი პარტიის წევრებზე, რომლებმაც 2012 წლიდან არნახულ ზეწოლებს გაუძლეს“, – დასძინა მაჭავარიანმა.