”სისხლის სამართლის საპროცესო კოდექსში” დაგეგმილი ცვლილებების მიხედვით, ფარული ვიდეო და აუდიო ჩაწერა და ფოტოგადაღება ოპერატიულ-ტექნიკური სააგენტოს ექსკლუზიური უფლებამოსილება არ იქნება და ფარული საგამოძიებო მოქმედებების განხორციელების უფლებამოსილება, საკუთარი კომპეტენციის ფარგლებში, სხვა შესაბამის სახელმწიფო ორგანოსაც ექნება.
პარლამენტში ინიცირებული პროექტის მიხედვით, ოპერატიულ-ტექნიკური სააგენტოს ექსკლუზიური უფლებამოსილება იქნება მხოლოდ სატელეფონო კომუნიკაციის ფარული მიყურადება და ჩაწერა, ინფორმაციის მოხსნა და ფიქსაცია კავშირგაბმულობის არხიდან, კომპიუტერული სისტემიდან და ამ მიზნით კომპიუტერულ სისტემაში შესაბამისი პროგრამული უზრუნველყოფის საშუალებების ინსტალაცია, ასევე გეოლოკაციის რეალურ დროში განსაზღვრა და საფოსტო-სატელეგრაფო გზავნილის (დიპლომატიური ფოსტის გარდა) კონტროლი.
ინიცირებული პროექტის მიხედვით, ფარულ ვიდეო და აუდიო ჩაწერას და ფოტოგადაღებას სააგენტოს გარდა, ნებისმიერი სხვა სახელმწიფო ორგანო განახორციელებს, რომელსაც ეს საგამოძიებო მიზნებისათვის დასჭირდება. სხვა სახელწიფო საგამოძიებო ორგანოები განახორციელებენ ისეთ ფარულ საგამოძიებო მოქმედებებს, როგორიცაა ელექტრონული თვალყურის დევნება ტექნიკური საშუალებებით, რომელთა გამოყენება ზიანს არ აყენებს ადამიანის სიცოცხლეს, ჯანმრთელობას და გარემოს.