პაველ ჰერჩინსკი მუდმივად იმეორებს, რომ არავითარი აგრესია არასდროს დაუფინანსებიათ, მაგრამ რეალობა აბსოლუტურად სხვა არის, – ამის შესახებ პარლამენტის ვიცე-სპიკერმა, გია ვოლსკიმ განაცხადა.
მისი თქმით, ჰერჩინსკის პრაქტიკულად პასუხი არ აქვს იმაზე, თუ რას წარმოადგენდა მაგალითად, ის აქცია, რომელიც ევროკავშირის წევრი ქვეყნების საგარეო საქმეთა მინისტრებმა ჩაატარეს რუსთაველზე რადიკალურ ოპოზიციონერებთან ერთად, ექსტრემისტებთან ერთად.
„ისინი პირდაპირ მოუწოდებდნენ საზოგადოებას, განსაკუთრებით ახალგაზრდებს დაპირისპირებისკენ, ხელისუფლების გადაყენებისკენ. პირდაპირი განცხადებები – აიღეთ იარაღი და ისროლეთო – არ გაკეთებულა, მაგრამ ფაქტია, რომ დემონსტრირება ფიზიკურად, ფინანსურად, პოლიტიკურად, ყველანაირად აშკარად ხდებოდა და ახლაც მიმდინარეობს ეს პროცესი.
ასე რომ, ჰერჩინსკის, რა საკვირველია, სხვა არაფერი დარჩენია თუ არა საზოგადოებას უთხრას, რომ ის არაფერ შუაში არ არის, მაგრამ რეალობა აბსოლუტურად სხვა არის. ჩვენ ყველამ კარგად ვიცით, ვიცით ამის მიზეზიც. აბსოლუტურად არ არის ეს მიმართული საქართველოში მხოლოდ ხელისუფლების წინააღმდეგ, მთლიანობაში ეს არის მიმართული მთელი ქართული საზოგადოების და მთელი ქვეყნის წინააღმდეგ, პოლიტიკური გემოვნების მიუხედავად. რა საკვირველია, ამ ქმედებას აქვს აბსოლუტურად კონკრეტული აზრი, მიზანი, რომ საზოგადოება ჩაერთოს იმ დაპირისპირებაში, რომელიც მოუტანს მას ეკონომიკურ ნგრევას, თუმცა მთლიანად ეს დაპირისპირება ევროკავშირისთვის იქნება სასარგებლო“, – განაცხადა გია ვოლსკიმ.
ცნობისთვის, საქართველოში ევროკავშირის ელჩმა, პაველ ჰერჩინსკიმ ჟურნალისტებს დღეს განუცხადა, რომ ევროკავშირს არასდროს დაუჭერია მხარი ძალადობისთვის, არც საქართველოში და არც სხვაგან.