საპარლამენტო უმრავლესობის ლიდერმა, „ქართული ოცნების” აღმასრულებელმა მდივანმა, მამუკა მდინარაძემ სალომე ზურაბიშვილის მიერ პატრიარქისა და ეკლესიის შესახებ გაკეთებულ განცხადებას სიბინძურე უწოდა.
„რა იყო ის, რაც ქალბატონ სალომეს დღემდე არ უკადრია – ეს იყო პატრიარქის მიმართ მძიმე შეურაცხყოფა, თავდასხმა ეკლესიასა და პატრიარქზე – დღეს ესეც მოახერხა. არ ვიცი, მას შეეცვალა საერთოდ აზროვნება, მართლა ასე ფიქრობს თუ ვიღაც ავალებს, მაგრამ ყველა შემთხვევაში ფაქტი სახეზე გვაქვს, რომ ქალბატონმა სალომემ ესეც მოახერხა – პატრიარქს თავს დაესხა და ცოცხალ ადამიანზე, რომელმაც ძალიან დიდი ხანი უნდა იცოცხლოს და ჯანმრთელობა უნდა ვუსურვოთ, ლაპარაკობს მის შემცვლელზე, მის სისუსტეზე და მინიშნების კონტექსტში პროევროპულ და რუსულ განწყობებზე საპატრიარქოში. სად დადგა ეს დღის წესრიგში?! რა პროევროპული მართვა?! მგონია, რომ რბილი ნათქვამიც კია სიბინძურე, თუ ამ კომენტარს დავარქმევთ ამ ტერმინს“, – აღნიშნა მამუკა მდინარაძემ.
საპარლამენტო უმრავლესობის ლიდერმა განაცხადა, რომ პრეზიდენტმა დღეს იკადრა ის, რაც ყველაზე რადიკალური ოპოზიციის მხოლოდ ნაწილმა იკადრა.
პრეზიდენტმა სალომე ზურაბიშვილმა, ლონდონში, საერთაშორისო საქმეთა სამეფო ინსტიტუტი სტუმრობისას, ჟურნალისტის კითხვის საპასუხოდ, საქართველოს პატრიარქსა და ეკლესიაზე განაცხადა: “ძალიან კომპლექსური ვითარებაა, რისი მიზეზიც დღეს პატრიარქის სისუსტეა. დარწმუნებული ვარ, ქართული ეკლესია მოახერხებს პროქართული და პროევროპული პატრიარქის არჩევას და არა პრორუსის.”