ავიაკომპანია „რედ ვინგსთან“ დაკავშირებით სიუჟეტი დადგმული იყო კონკრეტული ტელეკომპანიის მიერ. ვფიქრობ, რომ ეს ჟურნალისტური ეთიკის სტანდარტების ღია დარღვევა იყო, როგორც ხშირ შემთხვევაში ხდება ხოლმე, სამწუხაროდ, ცრუ ინფორმაციის გავრცელება. კონკრეტულად ფაქტი არ ჰქონდათ – საუბარი იმაზე, რომ ჩვენ გვაქვს რაიმე კომუნიკაცია კონკრეტულ სახელმწიფო უწყებებთან, ბუნებრივია, ამის არანაირი დასაბუთება მათ არ ჰქონდათ, – ლევან დავითაშვილმა პარლამენტში „მინისტრის საათის“ ფორმატში გამოსვლის შემდეგ უპასუხა „ნაციონალური მოძრაობის“ წევრის, დეპუტატ ლევან ბეჟაშვილის კითხვას რუსულ ავიაკომპანია „რედ ვინგსთან“ დაკავშირებით.
პირველი ვიცე-პრემიერის განცხადებით, ოპოზიციური მედიის მიერ გავრცელებული ინფორმაცია, თითქოს რუსულმა ავიაკომპანიამ პირადად მას გამოუგზავნა წერილი რუსეთის ქალაქებიდან საქართველოს საერთაშორისო აეროპორტებში ახალი ავიარეისების დამატების შესახებ, სრულად დეზინფორმაცია იყო.
„წერილი, რომლითაც თავზე დამადგნენ, არ გვინახავს, გადავამოწმეთ და საერთოდ არ მიგვიღია – არ შემოსულა სამოქალაქო ავიაციის სააგენტოში, არც სამინისტროში კომპანია „რედ ვინგსის“ მიმართვა. ავტომატურ რეჟიმში სამოქალაქო ავიაციის სააგენტოსთვის განსაზღვრულია ორი პირობა: ეს არის კომპანიები, რომლებიც არ იმყოფებიან ევროკავშირის შავ სიაში – მათ ეძლევათ რუსეთში ფრენის საშუალება. ასევე კომპანიები არ უნდა იყენებდნენ საჰაერო ხომალდებს, რომლის ტექნიკური მხარდაჭერაც შეწყვიტა მწარმოებელმა. ამ ორი კრიტერიუმით ავტომატურ რეჟიმში იღებს გადაწყვეტილებას სამოქალაქო ავიაციის სააგენტო“, – განაცხადა ლევან დავითაშვილმა.
კონომიკის მინისტრის განცხადებით, დღეისთვის რუსეთიდან საქართველოში ფრენებს და პირიქით ახორციელებს 3 კომპანია: georgian airways, azimuth, redwings. ამასთან, კომპანია redwings ახორციელებს ფრენებს თურქეთში, ისრაელში, ეგვიპტეში, ტაილანდში, გაერთიანებულ საამიროებში, შუა აზიის ყველა ქვეყანაში, საქართველოს ყველა მეზობელ ქვეყანაში და ა.შ.
„ასე რომ, საქართველომ განსაზღვრა კონკრეტული პირობები და კრიტერიუმები – რა პირობებით იქნებოდა ფრენა რუსეთის ფედერაციასთან და ამას ასრულებს სამოქალაქო ავიაციის სააგენტო. აქაც, როგორც ტელეკომპანიის სიუჟეტში სკანდალის ჩვენების მცდელობა, ისეთივე იყო ბატონი ლევან ბეჟაშვილის კითხვა. რაც შეეხება ჟუკოვსკის აეროპორტს, იქიდან სრულდება ჩვეულებრივი სამოქალაქო ფრენები და მას აქვს მინიჭებული „იკაო“-ს ადგილმდებარეობის განმსაზღვრელი ოთხნიშნა კოდი, ასევე საჰაერო ტრანსპორტის საერთაშორისო ასოციაცია „იატა“-ს ადგილმდებარეობის განმსაზღვრელი სამნიშნა კოდი, ანუ ორი მნიშვნელოვანი საერთაშორისო ორგანიზაციის მიერ აქვს მინიჭებული კოდები. ის არის სამოქალაქო ავიაციის აეროპორტად ცნობილი და ამ აეროპორტიდან ფრენები ხორციელდება ასევე ძალიან ბევრი საერთაშორისო მიმართულებით“, – განაცხადა პირველმა ვიცე-პრემიერმა.