უკრაინის გენერალურმა პროკურორმა, ანდრეი კოსტინმა 103 დღე გაატარა საზღვარგარეთ მივლინებაში, აქედან ნახევარი აშშ-ში, სადაც მისი მეუღლე ცხოვრობს. ინფორმაციას ამის შესახებ უკრაინული გამოცემა Ukrainska Pravda გენერალურ პროკურატურაში წყაროზე დაყრდნობით ავრცელებს.
„გენერალურმა პროკურორმა კოსტინმა 2023 წელს 103 დღე საზღვარგარეთ მივლინებებში გაატარა. ამ მოგზაურობების თითქმის ნახევარი შედგა შეერთებულ შტატებში, ვაშინგტონში, სადაც მისი მეუღლე ოფიციალურად ცხოვრობს“, – წერს გამოცემა Ukrainska Pravda.
ხუთშაბათს უკრაინულმა მედიამ უკრაინის პრეზიდენტის ოფისში წყაროზე დაყრდნობით ინფორმაცია გაავრცელა, რომ უკრაინის პრეზიდენტის ადმინისტრაციაში გენერალური პროკურორის, ანდრეი კოსტინის შესაძლო გადაყენების საკითხს განიხილავენ.
წყაროს ინფორმაციით, გადაწყვეტილება ჯერ მიღებული არ არის, თუმცა კოსტინის საკითხი სულ უფრო და უფრო ხშირად განიხილება შეხვედრებზე.
წყაროს თქმით, განიხილება კოსტინის ნიდერლანდებში ელჩად დანიშვნის ვარიანტი.