ისრაელი და აშშ დარწმუნებულნი არიან, რომ სირიაში ირანის საკონსულოზე სარაკეტო დარტყმის შემდეგ, ირანი ისრაელის წინააღმდეგ საპასუხო ზომებისთვის ემზადება. ინფორმაციას ამის შესახებ ამერიკული ტელეკომპანია CBS News-ი ამერიკულ ოფიციალურ წყაროებზე დაყრდნობით ავრცელებს.
აშშ-მა სადაზვერვო მონაცემები მოიპოვა, რომ ირანი გეგმავს საპასუხო თავდასხმას, რომელიც მოიცავს თავდასხმას დრონებისა და საკრუიზო რაკეტების გამოყენებით.
ოფიციალური პირები ამბობენ, რომ თავდასხმის დრო და სამიზნე უცნობია, მაგრამ პროპორციული პასუხი მოიცავს ისრაელის დიპლომატიურ ობიექტზე თავდასხმას.
ორშაბათს სირიის დედაქალაქ დამასკოში ირანის საკონსულოზე ისრაელის ავიაციის იერიშს „ისლამური რევოლუციის გუშაგთა კორპუსის“ „ალ-ქუდსის“ ქვედანაყოფის მეთაური, გენერალი მოჰამად რეზა ზაჰედი ემსხვერპლა.
სირიაში ირანის ელჩმა, ჰოსეინ აკბარიმ განაცხადა, რომ ირანის პასუხი სირიის დედაქალაქ დამასკოში ირანის საკონსულოზე სარაკეტო დარტყმაზე მკაცრი იქნება.
ირანის საგარეო საქმეთა სამინისტროში განაცხადეს, რომ ირანი ინარჩუნებს უფლებას, მიიღოს საპასუხო ზომები და თავად გადაწყვეტს, როგორი იქნება აგრესორის წინააღმდეგ პასუხისა და დასჯის სახეობა.
ისრაელის თავდაცვითი ძალების სპიკერმა, დანიელ ჰაგარიმ განაცხადა, რომ დამასკოში სარაკეტო დარტყმა განხორციელდა არა ირანის საკონსულოზე, არამედ „ალ-ქუდსის“ ქვედანაყოფის შენობაზე.