გიორგი მშვენიერაძე და „მთავარი არხი“ ერთ ხმაში საუბრობენ, მშვენიერაძეს უნდა, რომ შავი ფული დასავლეთიდან შემოვიდეს და გაკონტროლდეს სხვა მხრიდან ჩრდილოეთიდან, აღმოსავლეთიდან, სამხრეთიდან შემოსული ფული, – ამის შესახებ საპარლამენტო უმრავლესობის ლიდერმა, „ქართული ოცნების“ აღმასრულებელმა მდივანმა, მამუკა მდინარაძემ არასამთავრობო სექტორის წარმომადგენლის, გიორგი მშვენიერაძის ფეისბუქპოსტთან დაკავშირებით დასმული კითხვის საპასუხოდ, სადაც მშვენიერაძე წერს: „თუ ეს კანონი ევროკავშირის და აშშ-ის წინააღმდეგ არაა, ჩაწერონ რომ არ ვრცელდება მათგან მიღებულ დახმარებაზე და მხარს დავუჭერთ. ძალიან მარტივია“.
მამუკა მდინარაძის თქმით, შავი ფული არსაიდან არ უნდა შემოვიდეს, მათ შორის, არც დასავლეთიდან.
„დასავლეთიდან ბევრ კარგ საქმეს რომ აკეთებენ ის ადამიანები, კარგ ტრენინგებს, რომ ატარებენ და კარგ საქმეებს აფინანსებენ, ამაზე მადლობას ხომ ვუხდით, მაგრამ გამოვრიცხოთ შავი ფულის შემოდინება, რევოლუციის, პროპაგანდის დაფინანსება. პირიქით, უფლებების დაცვას შევუწყოთ ხელი, გავაძლიეროთ, მეც მოგეხმარებით. მაგალითად, რომელიმე არატრადიციული ცხოვრების წესის მქონე ადამიანების უფლებებზე თუ იქნება საუბარი, კი ბატონო, მაგრამ პროპაგანდირებაზე თუ იქნება, არ შემოვიდეს ასეთი თანხა. თუ შემოდის, დადეკლარირდეს. მთელი პარადოქსი, იცით, რაშია? ვერც ვკრძალავთ, უბრალოდ, არის მხოლოდ და მხოლოდ ინფორმაციული გამჭვირვალობა. დეკლარაცია უნდა შეავსონ. მეტზე არაფერზე საუბარი არ არის და ამისთვის, შავი ფულისთვის იბრძვიან. მშვენიერაძეს უთქვამს ის, რაც დასვა კითხვის სახით „მთავარმა არხმა“, დასავლეთიდან შემოვიდესო შავი ფული, რა უჭირსო და სხვა მხრიდან არ შემოვიდესო. ასეთი თვითლუსტრაცია ალბათ ბუნებაში არ არსებობს“, – განაცხადა მდინარაძემ.