რაც დრო გადის, ჩვენ მტკიცებულებებს ვხედავთ, რომ ხაზარაძე თავისი მოქმედებებით პირდაპირ თაღლითობაშია მხილებული, – ამის შესახებ „ხალხის ძალის“ აღმასრულებელმა მდივანმა გურამ მაჭარაშვილმა განაცხადა.
დეპუტატი გამოეხმაურა ინფორმაციას, რომლის თანახმად, ჰოლანდიელი ბიზნესპარტნიორი ხაზარაძე-ჯაფარიძეს 400 ათასი დოლარის დაბრუნებას სთხოვს.
„ჯერ იყო ლისთან დაკავშირებით მისი და მისი ჯგუფის თაღლითური სქემა, რომ აქციები ხელოვნურად გაზარდეს, მიყიდეს სხვას, მერე ბოდიში მოუხადეს და ფული დაუბრუნეს, ახლა კი არის ახალი სკანდალი, როდესაც თუ არ ვცდები ჰოლანდიელებმა იყიდეს აქციები, ისე რომ ხაზარაძის მხრიდან ეს შეფასება გაბერილი იყო და ახლა სთხოვენ 400 000 დოლარს. როდესაც ეს ადამიანი გამჭვირვალობაზე და საქართველოს მომავალზე საუბრობს, ჯერ უნდა გადავხედოთ მის წარსულს, ვნახოთ რა სქემებში იღებდა მონაწილეობას და ამის მერე ნახავს საზოგადოება, რამდენად გულწრფელია ის, როდესაც საუბრობს, რომ მას საქართველო სტკივა“, – განაცხადა მაჭარაშვილმა.
ჰოლანდიელი ბიზნესპარტნიორი მამუკა ხაზარაძესა და ბადრი ჯაფარიძეს 400 000 დოლარის დაბრუნებას სთხოვს. დაზარალებული ბიზნესმენის უფლებადამცველები არ გამორიცხავენ, რომ ხაზარაძე-ჯაფარიძის წინააღმდეგ საქმე პროკურატურაში წავიდეს. „იმედის კვირის“ ინფორმაციით, ეს თანხა ინვესტორმა „იმერეთი გრინერის“ განვითარებაში ჩადო, თუმცა, როგორც მისი ადვოკატები ამბობენ, ქართველმა პარტნიორებმა ინვესტორი მოატყუეს.