როდესაც ებრძვი გამჭვირვალობას და რაღაცის გამოაშკარავების გეშინია, ალბათ რაღაც გაქვს დასამალი, – ამის შესახებ მაკა ბოჭორიშვილმა განაცხადა. პარლამენტის ევროპასთან ინტეგრაციის კომიტეტის თავმჯდომარე მიიჩნევს, რომ გამჭვირვალობის კანონის მოწინააღმდეგეთა არგუმენტაცია არასწორია.
„არგუმენტი იმასთან დაკავშირებით, თითქოს ეს [კანონი] ვინმეს წინააღმდეგ არის მიმართული, აბსოლუტურად არასწორია. არ შეიძლება ვინმემ, თუკი ის კეთილსინდისიერად მოქმედებს ამ ქვეყანაში და კეთილსინდისიერად საქმიანობს, ეს [კანონი] დაინახოს როგორც მის წინააღმდეგ მიმართული“, – აღნიშნა ბოჭორიშვილმა.
საპარლამენტო უმრავლესობის გადაწყვეტილებით, კანონპროექტი „უცხოური გავლენის გამჭვირვალობის შესახებ“ პარლამენტში ოფიციალურად დაინიცირდა. კანონპროექტში ნაცვლად ტერმინისა „უცხოური გავლენის აგენტი“ გამოყენებულია ტერმინი – „უცხოური ძალის ინტერესების გამტარებელი ორგანიზაცია“. კანონპროექტის ყველა სხვა ჩანაწერი უცვლელია.