გადამხდელებს, რომელთა რაოდენობა 145 ათასს შეადგენს, ჩამოეწერებათ ჯამში 590 მილიონის ოდენობის საგადასახადო დავალიანება, – ამის შესახებ შემოსავლების სამსახურის ვალის მართვის დეპარტამენტის უფროსმა ნიკა კანკიამ „დღის ქრონიკაში“ განაცხადა.
მისი თქმით, კანონ-პროექტი მომზადდა ფინანსთა სამინისტროში, რომელიც ითვალისწინებს ფიზიკური პირებისთვის აღიარებული საგადასახადო დავალიანების ჩამოწერას, რომელიც წარმოშობილია 2021 წლის პირველ იანვრამდე.
„აღნიშნული კანონ-პროექტი ეხება საგადასახადო დავალიანებას, ყველა გადასახადში. მთავარი კრიტერიუმი გახლავთ ის, რომ წარმოშობილი უნდა იყოს 2021 წლის პირველ იანვრამდე და უნდა ერიცხებოდეთ ფიზიკურ პირებს. ფიზიკურ პირებში იგულისხმება როგორც მეწარმე, ასევე არამეწარმე ფიზიკური პირები, მათ შორის ინდივიდუალური მეწარმეები, მცირე და მიკრო ბიზნესის სტატუსის მქონე ფიზიკური პირები. სწორედ აღნიშნულ გადამხდელებს, რომელთა რაოდენობა 145 ათასს შეადგენს, ჩამოეწერებათ ჯამში 590 მილიონის ოდენობის საგადასახადო დავალიანება.
აღნიშნული პროექტი ინიცირებულია პარლამენტში. შესაბამისად, კანონში ცვლილების შეტანის შემდეგ მყისიერად განხორციელდება აღნიშნული დავალიანებების ჩამოწერა გადამხდელებისთვის. აქვე აღსანიშნავია, რომ დავალიანების ჩამოწერა თავისთავად გულისხმობს იძულებითი ღონისძიებების გაუქმებას, რაც მათზე დღეის მდგომარეობით ვრცელდება, ვგულისხმობ, საგადასახადო გირავნობა-იპოთეკას, ყადაღას და საგადასახადო ინკასოს გავრცელებას. საგადასახადო დავალიანების ჩამოწერისთანავე აღნიშნული შეზღუდვები გადამხდელზე ავტომატურად გაუქმდება“, – აღნიშნა ნიკა კანკიამ.