უკრაინის პრეზიდენტმა, ვოლოდიმირ ზელენსკიმ განაცხადა, რომ რუსეთის გავლენამ ამერიკის პოლიტიკურ სისტემაში შეაღწია. ინფორმაციას ამის შესახებ გამოცემა POLITICO ავრცელებს.
უკრაინის ლიდერმა აღნიშნა, რომ მან შუამავლების მეშვეობით ტრამპს უკრაინაში ჩამოსვლისკენ მოუწოდა.
„თუ შეთანხმება არის ის, რომ ჩვენ უბრალოდ დავთმობთ ჩვენს ტერიტორიებს, მაშინ ეს ძალიან პრიმიტიული იდეაა. ძალიან ძლიერი არგუმენტები მჭირდება. მე არ მჭირდება ფანტასტიკური იდეა, მე მჭირდება რეალური იდეა, რადგან ადამიანების სიცოცხლეზეა საუბარი“, – განაცხადა უკრაინის პრეზიდენტმა.
ბოლო კვირების განმავლობაში, ორმა რესპუბლიკელმა კონგრესმენმა, რომლებიც მხარს უჭერენ უკრაინის დახმარებას – მაიკ ტერნერმა და მაიკ მაკკოლმა – განაცხადეს, რომ პრორუსულმა პროპაგანდამ კონგრესის ზოგიერთი წევრის აზროვნებაში შეაღწია.
ზელენსკიმ ხაზი გაუსვა რუსეთის გავლენის პრობლემას დემოკრატიულ ქვეყნებში, როგორიცაა შეერთებული შტატები.
„რუსეთს ყველგან ჰყავს ლობი: აშშ-ში, ევროკავშირის ქვეყნებში, ბრიტანეთში, ლათინურ ამერიკაში, აფრიკაში. როდესაც ვსაუბრობთ კონგრესზე – ამჩნევთ, როგორ მუშაობენ ისინი საზოგადოებასთან შეერთებულ შტატებში?“ – განაცხადა უკრაინის პრეზიდენტმა.
მისი თქმით, რუსეთმა მოახერხა მსოფლიო საინფორმაციო ველის დამახინჯება.