ისრაელში, ხეხტის მუზეუმში პატარა ბიჭმა უძველესი არტეფაქტი შემთხვევით გატეხა.
BBC-ს ცნობით, 4 წლის ბიჭი მუზეუმში მამასთან ერთად იყო მისული, როდესაც 3 500 წლის ამფორას შეეხო და გატეხა.
ამფორა ბრინჯაოს ხანას მიეკუთვნებოდა და დამცავი მინის გარეშე იყო გამოფენილი, რადგან მუზეუმში სჯერათ, რომ არქეოლოგიური აღმოჩენების შეზღუდვების გარეშე დემონსტრირებას „განსაკუთრებული ხიბლი“ აქვს.
როგორც ბიჭის მამა ჰყვება, ბავშვმა ამფორა „ოდნავ მოწია“, რადგან „აინტერესებდა რა იყო შიგნით“. შედეგად არტეფაქტი დაეცა და გატყდა. თუმცა მუზეუმის თანამშრომლები მომხდარს გაგებით მოეკიდნენ და როცა გაარკვიეს, რომ ბიჭს ნივთი განზრახ არ დაუზიანებია, ის და მისი ოჯახი გიდის თანხლებით ახალ ტურზე დაპატიჟეს.
ამფორას კი რესტავრაციას ჩაუტარებენ და უახლოეს მომავალში კუთვნილ ადგილას დააბრუნებენ. ამასთან, მუზეუმში ობიექტების დამცავ მინაში მოთავსებას მომავალშიც არ აპირებენ.