პოლიციელი გია ხალვაში, რომელმაც 11 მარტის ბათუმში განვითარებულ მოვლენებთან დაკავშირებით სასამართლოში სუს–სა და პოლიციას შორის დაპირისპირებაზე პირველი კომენტარი გააკეთა, სამსახურიდან გაათავისუფლეს.
ამის შესახებ “პირველს” შსს–დან აცნობეს.
„გია ხალვაშის წინააღმდეგ შსს-ს გენერალურ ინსპექციაში მიმდინარეობდა დისციპლინური საქმისწარმოება, ეს არ უკავშირდება კონკრეტულად ბათუმის მოვლენებს, რამდენიმე სამსახურეობრივ გადაცდომაზე იყო საუბარი და ხალვაში დაკავებული თანამდებობიდან გენერალური ინსპექციის დასკვნის საფუძველზე გათავისუფლდა“, – უთხრეს „პირველს“ შსს–ში.
11 მარტს ბათუმში მიმდინარე აქციაზე, სადაც მოქალაქეები პოლიციელების მხრიდან მანქანების გაჩერების წესების დარღვევის გამო გახშირებულ ჯარიმებს აპროტესტებდნენ, რამდენიმე პირი დააკავეს. 12 მარტს გამთენიისას, აქციის მონაწილეებმა პოლიციის ეზოში შეჭრა სცადეს, რის გამოც სპეცდანიშნულების რაზმმა მათ დასაშლელად ცრემლსადენი გაზი გამოიყენა.
www.pia.ge