ბათუმში ახალი მეჩეთის მშენებლობა წელს დაიწყება. ამის შესახებ აჭარის საზოგადოებრივ მაუწყებელს “ბათუმში მეჩეთის მშენებლობის საინიციატივო ჯგუფის” ხელმძღვანელმა ტარიელ ნაკაიძემ განუცხადა.
ნაკაიძის თქმით, მეჩეთი სჭირდება ქართველ მუსლიმებს და ეს არაა პოლიტიკური გადაწყვეტილება.
“მეჩეთის მშენებლობა წელს დაიწყება, უკვე ვასრულებთ პროექტს და წარვუდგენთ შესაბამისი დოკუმენტაციით ბათუმის მერიას. ვფიქრობ, ამ მეჩეთის აგება საქართველოს დემოკრატიის ნიშანი იქნება და დარწმუნებული ვარ, ხელისუფლება გადმოდგამს ჩვენი მისამართით პოზიტიურ ნაბიჯებს. ეს რა იქნება პოლიტიკური მიზნებისთვის აგებული მეჩეთი, ეს იქნება მლოცველებისთვის განკუთვნილი ადგილი”, – განაცხადა ნაკაიძემ.
“ქართველ მუსლიმთა კავშირის” ხელმძღვანელი იმედს იტოვებს, რომ მშენებლობის ნებართვის პრობლემა ქართველ მუსლიმებს არ იქნებათ.
“იმედს ვიტოვებ, რომ ნებართვის პრობლემა არ იქნება, თუმცა თუ მსგავსი რამ მოხდა ვიბრძოლებთ სამართლებლივად. მინდა ავღნიშნო, რომ ხშირად გვაქვს შეხვედრები ზურაბ პატარაძესთან, ბოლოს ერთი კვირის წინაც შევხდით, ვისაუბრეთ სხვადასხვა საკითხებზე და მათ შორის ახალი მეჩეთის მშენებლობაზეც. ამ საკითხზე უფრო ვრცლად ვისაუბრებ როცა ჩამოვალ ბათუმში, თუმცა მინდა ავღნიშნო, რომ ეს მეჩეთი ჩვენი ქვეყნისთვის იქნება ისტორიული, ამიტომ ვცდილობთ მისი არქიტექტურაც იყოს ახალი და განსხვავებული, გვინდა საქართველოში ჩამოსულ ტურისტს ეს ადგილიც დაამახსოვრდეს და ეს მეჩეთი გაიხსენოს, როგორც ბათუმის მეჩეთი მისი განსხვავებული არქიტექტურის გამო. ეს უნდა აწყობდეს ნებისმიერ ხელისუფლებას, ვინც არ უნდა იყოს იგი” – განაცხადა ნაკაიძემ.