რეგიონებში საახალწლო ღონისძიებები გრძელდება. საზეიმო ფეიერვერკითა და გალაკონცერტით დასრულდა საახალწლო ღონისძიება დაბა ასპინძაში. მსმენელის წინაშე წარდგნენ ანსამბლი ჰერიო და ჯგუფი რეგიონი. დაბის ცენტრში მთელი დღის განმავლობაში ხალხმრავლობა იყო. სტუმრებს საშობაო ბაზრობაზე ცხელი სასმელებითა და ტკბილეულით უმასპინძლდებოდნენ. გაიხსნა ხელნაკეთი ნივთების გამოფენა-გაყიდვა. ბავშვებს საზეიმო განწყობა შუქმნა სანტამ ელფებთან ერთად და პატარებს საჩუქრები დაურიგა. მოეწყო თეატრალიზებული მსვლელობა ორკესტრის, ზღაპრის გმირებისა და ოჩოფეხების მონაწილეობით. ბავშვებისთვის გაიმართა სხვადასხვა საინტერესო და გასართობი აქტივობა და წარმოდგენები.
„ახალი წლის დღეები“ სამცხე-ჯავახეთის 5 მუნიციპალიტეტში უკვე გაიმართა, 30 დეკემბერს კი საახალწლო ღონისძიებას, დაბა ბაკურიანი უმასპინძლებს.
ჭიათურაში, საქართველოს მთავრობის გადაწყვეტილებით ჩატარებულმა „ახალი წლის დღეებმა“ ყველა თაობა გააერთიანა. ადგილობრივები და პროექტში ჩართული ხელოვანები, ერთხმად აღნიშნავენ, რომ ჭიათურაში საახალწლო განწყობა შეიქმნა და პროექტის განხორციელება საჭირო იყო.
,,ახალი წლის დღეები“ გაიმართა თეთრიწყაროს მუნიციპალიტეტშიც. გაიხსნა საბავშვო გასართობის სივრცეები, საშობაო ბაზრობა, გამოიფინა ადგილობრივი ნაწარმი და ხელნაკეთი ნივთები. თოვლის ბაბუამ პატარებს საჩუქრები დაურიგა. გაიმართა ორკესტრისა და კოსტიუმირებული გმირების მსვლელობა, ასევე ილუზიონისტის შოუ. ღონისძიება დასრულდა გალაკონცერტით, რომელშიც ადგილობრივ შემსრულებლებთან ერთად, მონაწილეობდნენ „თეატრალური კვარტეტი“, ანსამბლი „გორდელა“ და ჯგუფი ,,გუფილენდი“.
ქარელში, ქალაქის ცენტრში განთავსდა საახალწლო სახლები, ფოტოგადასაღები, სტენდები და ინსტალაციები. გაიხსნა საშობაო ბაზრობაც, სადაც ადგილობრივი ნაწარმი და ხელნაკეთი ნივთები გამოიფინა. მთელი დღის განმავლობაში მიმდინარეობდა სადღესასწაულო აქტივობები. პატარებს თოვლის ბაბუამ უმასპინძლა. საზეიმოდ აინთო ქალაქის მთავარი ნაძვის ხე. ღონისძიებები კონცერტითა და საზეიმო ფეიერვერკით დასრულდა.
ხელვაჩაურის მუნიციპალიტეტში საქართველოს მთავრობის მიერ ორგანიზებული საახალწლო ღონისძიება გაიმართა. სცენის მიმდებარედ მოეწყო მეწარმეთა ხელნაკეთი ნივთების გამოფენა-გაყიდვა. ღია სივრცეში შესაძლებელი იყო ცხელი სასმელების დაგემოვნება. საბავშვო სივრცეში პატარებს თოვლის ბაბუა, ზღაპრის გმირები და ჯამბაზები ეგებებოდნენ. გაიმართა დრამერების შოუ, კოსტიუმირებული გმირების მსვლელობა და საბავშვო კონცერტი. მუსიკალური და გასართობი პროგრამის შემდეგ, ჩატარდა გალაკონცერტი, მონაწილეობდნენ დუეტი „ლეონი” და „ღამის შოუს ბენდი” . ღონისძიებას ხელვაჩაურის მუნიციპალიტეტის მერი ზაზა დიასამიძე, საკრებულოს თავმჯდომარის პირველი მოადგილე არჩილ მხეიძე, მერის მოადგილეები და საკრებულოს წევრები ესწრებოდნენ. საღამო გრანდიოზული ფეიერვერკით დასრულდა.
„ახალი წლის დღეების“ – ფარგლებში, დატვირთულ საახალწლო პროგრამას ხობმა უმასპინძლა. ქალაქის ცენტრში განთავსდა სხვადასხვა დეკორაციები, ხის საახალწლო სახლები, ფოტოგადასაღები სტენდები და ინსტალაციები. საღამო კონცერტითა და საზეიმო ფეიერვერკით დასრულდა, გალაკონცერტზე „ქართულმა ხმებმა“ და „ზუკას ბენდმა“ იმღერეს.
„ახალი წლის დღეები“ საქართველოს მთავრობის გადაწყვეტილებით, წელს უკვე მეოთხედ იმართება. ღონისძიებები სამეგრელო-ზემო სვანეთის ცხრავე მუნიციპალიტეტში გაიმართა.