რომ არ გახდეს სპეკულაციის საფუძველი, თითქოს ჩვენ არჩევნებამდე ავკრძალეთ რაიმე პარტია და არ მივეცით მონაწილეობის საშუალება, თუ აქვთ გამბედაობა და რაიმე რეიტინგის იმედი, მიიღონ მონაწილეობა არჩევნებში, – განაცხადა „დღის ქრონიკასთან“ პარლამენტის თავმჯდომარის მოადგილემ ნინო წილოსანმა „ნაცმოძრაობის“ აკრძალვასთან დაკავშირებით საუბრისას.
მისი თქმით, საგამოძიებო კომისიის მუშაობის ვადის გახანგრძლივებამ გამოიწვია ის, რომ საკონსტიტუციო სასამართლოსთვის მიმართვის პროცესმა გადაიწია.
„ყველა მოაზროვნე ადამიანს ალბათ, ერთი სული აქვს და მოლოდინში არის, რომ ეს ძალადობრივი და ბოროტმოქმედი პარტია და პოლიტიკური ძალები აიკრძალონ. ჩვენც შეიძლება ეს ემოცია უნდა გვაჩქარებდეს, მაგრამ მეორე მომენტში რაციონალიზმი და პრაგმატული გათვლა ის აუცილებელი კომპონენტია, რაც პოლიტიკურ პარტიას უნდა ჰქონდეს. შესაბამისად, ჩვენ ვიმსჯელეთ და გადაწყვეტილება იქნა მიღებული, რომ საგამოძიებო კომისიის მუშაობის პრინციპიდან გამომდინარე და იმ აუცილებლობიდან გამომდინარე, რომ მას მიეცეს დამატებით კიდევ ერთთვიანი ვადა, რომ მეტ-ნაკლებად მოიცვას და ამოწუროს 2012 წლამდე პერიოდი, რა თქმა უნდა რთულია ყველა იმ მავნებლობაზე გაამახვილო ყურადღება ან მოახდინო საჯარო მოსმენა, რომელიც ამ პერიოდში ხორციელდება. თუმცა ვფიქრობ, რომ ძალიან კარგად ახერხებს საგამოძიებო კომისია, რომ ის ძირითადი აქცენტები მაინც კიდევ ერთხელ გამოიტანოს დღის შუქზე. ამიტომ ამ გახანგრძლივებული ვადის პირობებში, უკვე იმდენად გადაიწია საკონსტიტუციო სასამართლოზე მიმართვის პროცესმა, რომ ვფიქრობთ მიზანშეწონილი არის აღნიშნული საკითხის არჩევნების შემდგომ გადადება. მათ შორის, რომ არ გახდეს ეს ყველაფერი სპეკულაციის საფუძველი და რომ არ იყოს გამოყენებული იმგვარად ამ საკითხის წარმოჩენის, რომ თითქოს ჩვენ არჩევნებამდე ავკრძალეთ რაიმე პარტია და მათ არ მივეცით არჩევნებში მონაწილეობის საშუალება, მოდით ახლა კიდევ ერთხელ თამამად შევთავაზოთ მათ, რომ თუ აქვთ იმის გამბედაობა და თუ ოდნავ მაინც აქვთ რაიმე რეიტინგის იმედი, მიიღონ მონაწილეობა არჩევნებში და დაამტკიცონ, რომ ახლა რომ რუსთაველზე დგანან და ხმამაღლა ყვირიან თუ მღერიან ათას სისულელეს, ამის ლეგიტიმური უფლება ან ოდნავ მაინც ხალხიდან მოცემული უფლება და საშუალება აქვთ. ამიტომ რა თქმა უნდა არჩევნებზე ვიწვევთ ამ პარტიებს ორთაბრძოლაში, თუმცა ეჭვი გვეპარება, რომ მათი უმრავლესობა გადაწყვეტს, ყოველ შემთხვევაში მათი გადასაწყვეტი რომ იყოს ნამდვილად უარს იტყოდნენ არჩევნებში მონაწილეობაზე, იმიტომ, რომ მარცხი გარდაუვალია. თუმცა, ისინი დიდწილად დამოკიდებულები არიან მათ პატრონებზე, რა იქნება დავალება, როგორი გათვლა ექნებათ მათ“, – განაცხადა ნინო წილოსანმა.