აშშ მზად არის, აღიაროს რუსეთის კონტროლი ყირიმზე მოსკოვსა და კიევს შორის უფრო ფართო სამშვიდობო შეთანხმების ფარგლებში. ინფორმაციას ამის შესახებ სააგენტო Bloomberg-ი ინფორმირებულ წყაროებზე დაყრდნობით ავრცელებს.
წყაროების ინფორმაციით, ამ საკითხზე საბოლოო გადაწყვეტილება ჯერ მიღებული არ არის. თეთრმა სახლმა და სახელმწიფო დეპარტამენტმა კომენტარის თხოვნაზე არ უპასუხეს.
ხუთშაბათს პარიზში აშშ-მა მოკავშირეებს წარუდგინა წინადადებები, რომლებიც რუსეთსა და უკრაინას შორის სამშვიდობო შეთანხმების მიღწევას შეუწყობს ხელს, მათ შორის საბრძოლო მოქმედებების დასრულებისა და ცეცხლის ხანგრძლივი შეწყვეტის შემთხვევაში, მოსკოვზე დაწესებული სანქციების შემსუბუქების პირობების მონახაზი.
წინადადება მოიცავს ფრონტის ხაზის გაყინვას, ხოლო უკრაინის დანარჩენი ტერიტორიის უმეტესი ნაწილი, რომელიც ამჟამად რუსეთის მიერ არის ოკუპირებული, ფაქტობრივად მოსკოვის კონტროლის ქვეშ დარჩება. ასევე დღის წესრიგიდან მოიხსნება უკრაინის ნატოში გაწევრიანების მისწრაფებები.