ევროკავშირის მხრიდან ვიზალიბერალიზაციის თემით შანტაჟზე საუბრობს „ხალხის ძალის“ აღმასრულებელი მდივანი გურამ მაჭარაშვილი. როგორც მან ჟურნალისტებთან საუბრისას განაცხადა, ის რომ ევროკავშირი შანტაჟის ენით საუბრობს, ახალი არ არის. სწორედ ამიტომ, მაჭარაშვილი ევროკავშირის ბიუროკრატიასა და საბჭოთა კავშირის დიქტატს შორის განსხვავებას ვერ ხედავს, რადგან ორივეს შემთხვევაში, საქართველოსგან მორჩილებას ითხოვენ.
„შანტაჟის მექანიზმებს რომ ეძებს ევროკავშირის დღევანდელი ბიუროკრატია, ეს არა მარტო ჩვენი ნარატივი და განცხადებაა, არამედ ერთ-ერთი ყველაზე ძლიერი ქვეყნის – ამერიკის შეერთებული შტატების პრეზიდენტის განცხადებაც არის, რომ ევროკავშირი უსამართლოდ ექცევა ამერიკას. წარმოიდგინეთ რა მასშტაბებზე არის საუბარი და შესაბამისად გავიხსენოთ როგორ გამოიყენეს შანტაჟისთვის კანდიდატის სტატუსის მექანიზმი, როგორ გამოიყენეს ზეწოლისთვის კანდიდატის სტატუსის მინიჭების შემდგომ მოლაპარაკებების გახსნის მექანიზმი და ახლა იყენებენ ვიზალიბერალიზაციას.
მოდით ძალიან მარტივად დავსვათ ეს საკითხი – ვიზალიბერალიზაცია ჩვენ რისთვისაც მოგვანიჭეს, ამას თავისი პროცედურები აქვს. ჩვენ იქ რამე დავარღვიეთ? როცა თქვენ მანიჭებთ მე რაღაცაზე ნებართვას და თან საუბრობთ პარტნიორულ ურთიერთობაზე, როცა მე ნებართვის მინიჭების ამ საფუძვლებს არ ვარღვევ და მაინც მემუქრებით ვიზალიბერალიზაციის გაუქმებით, იმიტომ რომ უბრალოდ არ ვასრულებ თქვენს პირდაპირ დავალებას – მეორე ფრონტს აქ არ ვხსნი; არ ვამტკიცებ ერთსქესიანთა ქორწინებას და არ ვცხოვრობთ თქვენი მითითებით გაუკუღმართებული ცხოვრებით, არის შანტაჟი.
კიდევ ერთხელ ვიმეორებ, ქართული საზოგადოების სურვილია გახდეს ევროპის ოჯახის წევრი ჩვენი ტრადიციებიდან გამომდინარე. ევროკავშირი და ევროპა ერთი არ არის. ჯერ კიდევ რომის პაპმა თქვა, სანამ ცოცხალი იყო, რომ ევროპა არის სხვა, ევროკავშირი არის სხვა. ევროკავშირამდე არსებობდა ევროპა, ქრისტიანობა, რაზეც იყო დაფუძნებული ევროპული ღირებულებები და რაზეც იყო და არის დაფუძნებული ქართული ღირებულებები. ამით ვართ თანხვედრაში და ახლა ევროკავშირის სახით რამდენიმე ათეულ წელში შექმნილი ორგანიზაცია ამ ღირებულებების წინააღმდეგ თუ წავა, ის არავის ჭირდება, მათ შორის არც ევროპას. ჩვენ გვავიწყდება, რომ ევროკავშირში არიან სახელმწიფოები, რომლებიც არ ეთანხმებიან ევროკავშირის ამ ბიუროკრატიას. ევროკავშირის „დიფსთეითის“ ნარატივია, რომ თურმე არ არის ევროპა უნგრეთი, სლოვაკეთი, იტალია, ნებისმიერი სახელმწიფო, რომლის საზოგადოებები არ იღებენ ამ გაუკუღმართებულ ცხოვრებას.
მე შევახსენებ კიდევ ერთხელ საზოგადოებას, რომ საბჭოთა კავშირის დროსაც ჰქონდა საქართველოს საბჭოთა კავშირიდან გასვლის უფლება, ეს ეწერა საბჭოთა კავშირის კონსტიტუციაში, მაგრამ პრაქტიკულად, ეს შეუძლებელი იყო და ჩვენ თუ ახლა მივიღეთ საბჭოთა კავშირის ნაცვლად ისეთი ევროკავშირი, რომელიც რეალურად ჩვენ აქ დაგვიწესებს როგორ უნდა ვიცხოვროთ, ამ შემთხვევაში განსხვავება რა არის? დღეს თუ იგივე პირობები შემიქმენი, რასაც კრემლი და რუსეთი მიქმნიდა, რა არის განსხვავება? სად არის ევროპული ღირებულება და სადაა განსხვავება რუსეთის იმპერიასა და ევროპას შორის?“ – განაცხადა გურამ მაჭარაშვილმა.