საქართველოს საგარეო საქმეთა მინისტრი მაკა ბოჭორიშვილი საქართველოში ვიზიტით მყოფ გაერო-სთან აკრედიტებულ მუდმივ წარმომადგენლებს შეხვდა.
კერძოდ, მაკა ბოჭორიშვილმა მიიღო გაერო-სთან ბურუნდის, ლესოტოს, ნეპალისა და ქუვეითის მუდმივი წარმომადგენლები. საგარეო საქმეთა სამინისტროს ინფორმაციით, მინისტრი მიესალმა ელჩების ვიზიტს საქართველოში და ხაზი გაუსვა ამგვარი ვიზიტების პოზიტიურ მნიშვნელობას.
მათივე ცნობით, შეხვედრაზე ელჩებს მიეწოდათ ინფორმაცია საქართველოს საგარეო პრიორიტეტების შესახებ.
„განსაკუთრებული ყურადღება დაეთმო საქართველოს ოკუპირებულ რეგიონებში არსებულ ვითარებას, საქართველოს რეგიონალურ როლს, ქვეყანაში გატარებულ რეფორმებს, ეკონომიკურ შესაძლებლობებსა და ქვეყნის ევროინტეგრაციის პროცესს. საუბარი ასევე შეეხო რეგიონში მიმდინარე მოვლენებს. მხარეებმა ისაუბრეს გაერო-ს ფარგლებში თანამშრომლობის საკითხებზე, ორგანიზაციაში მიმდინარე აქტუალურ პროცესებსა და საქართველოს ჩართულობაზე საერთაშორისო თანამეგობრობის ძალისხმევაში გლობალურ გამოწვევათა დაძლევის გზაზე“, – ნათქვამია საგარეო საქმეთა სამინისტროს ინფორმაციაში.
გაერო-სთან აკრედიტებულმა მუდმივმა წარმომადგენლებმა მოინახულეს საოკუპაციო ხაზი სოფელ ხურვალეთთან და ეწვივნენ დევნილთა დასახლებას წეროვანში.
„ელჩები იმყოფებოდნენ ასევე იუსტიციის სახლში, სადაც გაეცნენ საქართველოს წარმატებულ გამოცდილებას სახელმწიფო სერვისების მიწოდების კუთხით. ვიზიტის ფარგლებში, გაეროსთან აკრედიტებული მუდმივი წარმომადგენლები შეხვედრებს გამართავენ საქართველოს საკანონმდებლო და აღმასრულებელი ხელისუფლების წარმომადგენლებთან. აგრეთვე ეწვევიან კახეთისა და აჭარის რეგიონებს. დაგეგმილია შეხვედრა აჭარის ავტონომიური რესპუბლიკის მთავრობის წარმომადგენლებთან“, – აღნიშნულია საქართველოს საგარეო საქმეთა სამინისტროს ინფორმაციაში.
გაერო-სთან ბურუნდის, ლესოტოს, ნეპალისა და ქუვეითის მუდმივი წარმომადგენლები საქართველოს 21-27 აპრილის პერიოდში სტუმრობენ.