პაკისტანის ინფორმაციის მინისტრის, ატაულა ტარარის განცხადებით, ქვეყანას აქვს სარწმუნო ინფორმაცია რომ, ინდოეთი აპირებს სამხედრო დარტყმის განხორციელებას მომდევნო 24-36 საათში. ინფორმაციას ამის შესახებ „როიტერი“ ავრცელებს.
„აგრესიის ნებისმიერი აქტს პასუხი მოჰყვება. ინდოეთი სრულად იქნება პასუხისმგებელი რეგიონში ნებისმიერ სერიოზულ შედეგზე“, – წერს ტარარი სოციალურ ქსელში.
ინდოეთის საგარეო საქმეთა სამინისტროს აღნიშნულ ინფორმაციასთან დაკავშირებით ჯერჯერობით კომენტარი არ გაუკეთებია.
ცნობისთვის, ქაშმირის შტატის იმ ნაწილში, რომელსაც ინდოეთი აკონტროლებს, თავდასხმა 22 აპრილს მოხდა. შედეგად, 26 ადამიანი დაიღუპა.
ინდოეთის ხელისუფლების ცნობით, თავდამსხმელებიდან ორი პაკისტანის მოქალაქე იყო, რომელთა იდენტიფიცირებაც მოხერხდა. მომხდარის გამო ინდოეთის ხელისუფლებამ პაკისტანის ყველა მოქალაქისთვის ვიზების გაუქმების გადაწყვეტილება მიიღო. გარდა ამისა, ინდოეთმა პაკისტანთან ერთადერთი სასაზღვრო-გამშვები პუნქტი ჩაკეტა და განაცხადა, რომ აჩერებს წყლის რესურსების ერთობლივი გამოყენების შესახებ შეთანხმებას.
თავის მხრივ, პაკისტანმა ასევე მიიღო გადაწყვეტილება, გააუქმოს ინდოეთის მოქალაქეების ვიზები. ამასთან, პაკისტანმა ჩაკეტა ინდური ავიაკომპანიებისთვის საჰაერო სივრცე და ვაჭრობის შეჩერების შესახებ განაცხადა.